«Teleradıo habarlaryn taratý týraly" zańǵa sáıkes memleket jarty jyl kóleminde efırlik sıfrlyq teleradıo habar taratýǵa aýysýdyń ýaqytyn belgileýi qajet», - dep málimdedi QR aqparat jáne komýnıkasıalar mınıstri Dáýren Abaev óziniń Facebook-tegi paraqshasynda.
«Biz qazir efırdi sıfrlyq teleradıo habar taratýǵa aýystyrý jumystaryn júrgizip jatyrmyz. Sıfrlyq televıdenıe - bul vıdeo belgi men dybys taratýdyń joǵarǵy sapasy, sondaq-aq vızýaldy kedergilerdi joıyp, tunyq dybysty qamtamasyz etedi», - deıdi mınıstr.
2018 jyldyń sońynda Qazaqstan Respýblıkasynyń birqatar oblystarynda sıfrlyq tele- jáne radıo habar taratylýyn kezeń-kezeńimen engizý jumystary bastalady. Sıfrlyq televızıany engizý jumystarynyń birinshi kezegi barysynda, aǵymdaǵy jyldyń aıaǵynda Mańǵystaý (qazan), Jambyl jáne Ońtústik Qazaqstan (jeltoqsan) oblystaryn sıfrlyq televızıamen tolyq qamtý jospralanýda.
Memleketimizdiń basqa aımaqtarynda sıfrlyq efırlik televızıany engizý jumystary 2020 jyldyń sońyna deıin kezeń-kezeńimen júrgiziledi. Atalǵan jumystar jospar boıynsha 2021 jyly aıaqtalatyn analogtyq televızıa habaryn taratýdy óshirý jumystarymen qatar júrgiziletin bolady.
Sıfrlyq habar taratýdy engizý jáne damytý jobasy «Sıfrlyq Qazaqstan» memlekettik baǵdarlamasyn júzege asyrý boıynsha is-sharalar josparyna engizilgen bolatyn.
Joba boıynsha 827 radıo jáne teledıdar stansasyn salý jáne jańǵyrtý jumystary josparlanǵan. Qurylys jumystary 2012 jyldan beri júrgizilýde jáne búgingi tańda 356 stansa salyndy. Jyldyń sońyna deıin taǵy 292 stansa qurylysyn aıaqtaý josparlanýda, ol halyqtyń 94% -yn sıfrlyq habar taralymymen qamtýǵa múmkindik beredi. Qalǵan 179 stansany 2019-2020 jyldary paıdalanýǵa berý josparlanýda. Sıfrlyq efırlik habar taratý júıesi halyqqa oblystyq ortalyqtar men Astana jáne Almaty qalalarynda 30 otandyq telearnany, sondaı-aq aýyldyq eldi mekenderde 15 telearnany abonenttik ótemaqysyz sıfrlyq sapada kórýge múmkindik beredi. Osylaısha, efırlik sıfrlyq habar taratýdy engizý qala men aýyl turǵyndadrynyń arasyndaǵy aqparattyq teńsizdikti tómendetedi, sondaı-aq Qazaqstan Respýblıkasynyń aqparattyq keńistigin damytý úshin sapaly jańa múmkindikter beredi.
