Taraz qalasyndaǵy Jeńis saıabaǵy túpkilikti túrlenbek. Baýyrjan Momyshuly atyndaǵy demalys ornynda qurylys júrip jatyr. Máńgilik alaý men mýzeı, 68 myn jaýyngerdiń esimi jazylatyn kórkem keseneler jóndeý jumystary bitken soń saıabaq tórinen oryn almaq, dep habarlaıdy Qamshy.kz aqparat agenttigi.
Qurylysshylar eki aýysymda jumys istep, barlyq sharýany mamyrǵa deıin bitirýdi josparlap otyr.
Qalanyń qaq ortasynda turǵan, Baýyrjan Momyshulyna jáne Aýǵan soǵysy ardagerlerine arnalǵan eskertkishter osy saıabaqqa ákelinbek. Sonymen qatar Bylǵary kombınaty aýmaǵyndaǵy «máńgilik alaý da» osynda ornalasatyn bolady. Ekinshi dúnıejúzilik soǵysqa qatysqan 68 myń jaýyngerdiń esimi de saıabaqtaǵy mármár tasyna qashalyp jazylmaq.
Jeńis saıabaǵymen birge kóldeneń jatqan Jansúgirov kóshesi de ajarlana túspek. Buryn eni 7 metr bolǵan dańǵyl endi 12 metrge deıin keńeıtilýde. Qala turǵyndary úshin de, qaladaǵy kólik qozǵalysy úshin de onyń mańyzy orasan zor.
Taraz qalasynyń ákimi Rústem Dáýlettiń aıtýynsha, saıabaq qurylysyna 120 jumysshy men 30 tehnıka jumyldyrylǵan.
— Jan-jaqtan barlyq jobalaýshy mekemelerdi, sáýletshilerdi, músinshilerdi shaqyryp, solarmen keńese otyryp, ár jobany sol keńeste qarap, bekitip, ary qaraı sony jumysqa qosyp jatyrmyz. Saıabaqtyń ishinde qymyzhana, balalar oınaıtyn alańdar salynyp, jastardy patrıottyq sezimge baýlıtyn arhıtektýralyq jobalar da boı kóteredi, — deıdi ákim.
Rústem Dáýlet saıabaq arqyly ótetin Qarasý ózeniniń jaǵalaýy da retke keltirilip, túrli demalys oryndary ashylatynyn aıtady. Saıabaq ishinde jaıaý júrginshilerge jáne velosıpedke arnalǵan joldar paıda bolmaq. Osyndaı ıgi isterge oblystyq búdjetten 370 mln teńge qarastyrylǵan. Jospar boıynsha jambyldyqtar aldaǵy «Jeńis kúni» merekesin osy saıabaqta atap ótedi.
