Qatonqaraǵaı aýdanynyń Solonovka aýyldyq okrýgine qarasty egistikte uzyndyǵy 2 shaqyrymǵa taıaý jyra paıda boldy, dep habarlaıdy Qamshy.kz aqparat agenttigi.

Kóktemgi tasqyn Kishi Narym aýyly men qyrdaǵy qystaýlardyń arasyn jalǵap jatqan joldy jyryp ketken. Saldarynan uzyndyǵy eki shaqyrymǵa jetetin jyryq paıda bolǵan. Bul jolmen adam óte sırek qatynaıtyndyqtan, adam ómirine qaýip tóndiretin jaǵdaı bolmapty.

— Qar erip, egiske jaıylǵan qarǵyn sý qara joldyń boıymen ózen bolyp aqqan. Birneshe kún boıy toqtaýsyz aqqan sý joldy úlken jyraǵa aınaldyryp jibergen. Bul oqıǵany alǵash estigen kúni-aq tótenshe jaǵdaı  mamandaryna habarlaǵanbyz. Adam ómirine qaýip tónetindeı eshteńe joq. Qazir egis basynda 2 búldozer júr. Jergilikti halyq bul mańdy Qaraózek dep ataıdy. Jer Anatolıı Matasov degen sharýanyń ıeligine kiredi. Qojalyq ıesimen jıi habarlasyp, jaǵdaıyn bilip otyrmyz. Jyranyń  paıda bolýy egis naýqanyna eshqandaı kedergi bolmaıtynyn aıtyp otyr, – deıdi aýdan ákiminiń orynbasary Janbolat Tynybekov.

Jyranyń tereńdigi 5-6 metr, eni 4-5 metrge jetedi. Bul jer osydan bir aı buryn ǵana «Jas qanat» sharýa qojalyǵynyń qystaýlaryn bir-birimen jalǵap turǵan oryn edi. Egistikke qaraı jaıylyp, toqtaýsyz aqqan sý joldy jyraǵa aınaldyryp jibergen.

Bul oqıǵa ınternet qoldanýshylardy ájeptáýir alańdatyp tastady. Keıbiri atalmysh  jyrany Afrıka qurlyǵynda  paıda bolǵan alyp jaryqpen salystyryp jatyr. Alaıda, aýdan ákiminiń orynbasary J.Tynybekov jyra qar sýynan paıda bolǵanyn taǵy da naqtylady. Al taý jynysynyń qozǵalysy týraly aıtýdyń ózi artyq degen pikirde. Eske sala keteıik, búgin Shyǵys Qazaqstan oblysy aýmaǵynda jer silkinisi tirkelgen edi.

Aıta keteıik, jaqynda Shyǵys Afrıkada, Kenıanyń ońtústik-batysynda birneshe shaqyrymǵa sozylǵan úlken jyryq paıda boldy. «Ol jer qyrtysynyń ekige bólinip jatqanyn bildiredi», - deıdi mamandar. 

Jer qyrtysynyń jarylýy tektonıkalyq taqtaıshalardyń álsireýinen bolýy múmkin. Sarapshylar Afrıka kontınenti osylaısha ekige bólinedi dep boljap otyr.

Ǵaryshtan túsirilgen jarylǵan jer bólikteri bir ýaqytta paıda bolmaǵan. Efıopıanyń soltústigindegi Afar aýdanynda 30 mln jyl buryn bastaý alyp, jylyna 2-2,5 sm jyldamdyqpen bólinip, ońtústikke qaraı jyljyp otyrǵan. Jerdiń bulaısha bólinýi qazir Zımbabve jerine deıin jetti.

Ǵalymdar ondaǵan mıllıon jyl ótken soń, osy jerde jańa muhıt paıda bolady deıdi. Saldarynan Afrıka kontınenti kishireıip, Úndi muhıtynda jańa úlken aral paıda bolady dep boljanýda. Oǵan Efıopıa men Somalıdiń bir bóligi jáne Afrıka múıizi kirýi múmkin.