Mahatma Gandı atyndyǵy №92 ma­mandandyrylǵan lıseıinde  «Qam­qorshylyq keńesiniń» keńeı­tilgen otyrysy bolyp ótti.  Oǵan «Qamqor­shylyq keńesiniń» qurmetti tór­aǵa­sy Qorǵanys jáne aero­ǵarysh óner­kásibiniń mınıstri  Beıbit Atam­qulov­ qatysty.

Otyrys aldynda keńes músheleri lıseı zerthanalarynda júrip jatqan jobalyq zertteý jumystarymen tanysty. Qonaq­tarǵa erekshe  áser syılaǵan jobalardyń biri lıseı oqýshylarynyń Ońtústik Qazaqstan oblysyna uıymdasyp baryp qaıtqan ekspedısıasynyń nátıjesinde jasalǵan qazaqtyń rýhanı jádigerleri «Qarashash ana», «Ibrahım ata», «Arystan bab», «Qoja Ahmet Iassaýı»  keseneleriniń 3D modeli  boldy.

Lıseıdiń «Ujymdyq radıostan­sıa­symen» tanysyp, jer serikterin avto­matty túrde anyqtap, baqylaý júrgizetin spýt­nıktik antenanyń jumysyn kórgende «Aeroǵarysh» komıtetiniń tóraǵasy  Erkin Shaımaǵambetov: «Men mektep qabyrǵa­synan mundaı kásibı deńgeıi joǵary ǵajap jumystardy kóremin dep tipti oıla­ma­dym!», – dep tańqalysyn jet­kizdi. Antrak­tıdadan basqa álemniń barlyq aımaǵymen radıobaılanys ornatyp, tikeleı efırge shyǵyp otyrǵan lıseıdiń jas radıo­áýesqoılarymen birge kelgen qonaqtar da basqa álemge sapar shegip ketkendeı áser aldy.

Lıseı qonaqtary men keńes múshelerin  tańqaldyrǵan taǵy bir joba – «Ulttyq oıyn robottary» boldy.  Lıseıdiń jas ro­bo­to­tehnıkteri «Teńge ilý», «Arqan tartý», «Kókpar», «Asyq atý» sekildi qazaqtyń ulttyq sport oıyndaryn robottarǵa oınatyp jatqandaryn is júzinde kórsetti. Qonaqtardyń bári ulttyq oıyn robot­tarynyń jarysyn kórýge qyzyǵýshylyq tanytyp, qashan, qalaı  jáne qaı jerde ótetini jaıly  suraqtar qoıyp jatty. Jas robototehnıkter de osy jyly mektep bazasynda alǵashqy jarystaryn ótkize­tinderi týraly jarysa jaýap berdi.

5-6  synyp oqýshylary  kelgen qonaq­tarǵa ózderiniń tyń tehnologıa – krıo jolymen bıe sútinen balmuzdaq jasaý jobasymen tanystyryp, áp-sátte-aq bal­muzdaqty daıyndap, aldaryna tart­qanda tańdaı qaqpaǵan jan bolmady. Tipti, «Ae­ro­ǵarysh» komıtetiniń tór­aǵasy: «Mynaý naǵyz ǵarysh balmuzdaǵy ǵoı!», – dep bal­muzdaqqa jańa ataý berdi. Ekono­mıkalyq jaǵynan tıimdi jáne densaý­lyqqa da paıdasy mol bul bal­muzdaqtan barlyq kelgen qonaqtar dám tatty. Bal­muzdaqtan dám tatqandar bul balmuzdaqtyń basqaǵa uqsamaıtyn erekshe dámine tánti bolyp, oqýshylardyń bola­shaǵynan zor úmit kútetinderin jetkizdi. Osylaısha Mahatma Gandı atyndyǵy №92 maman­dandyrylǵan lıseıiniń  daryndy balalary tek bilimde ǵana emes, sonymen qatar zamanaýı tehno­logıalardan da aldaryna jan salmaı­tyndyqtaryn taǵy da bir dáleldedi.

Lıseı oqýshylarynyń talaptaryna tánti bolǵan qonaqtar oqýshylardyń bolashaqtaǵy ǵylym jolyna tabys tilep, «Qamqorshylyq keńesiniń» keńeıtilgen otyrysynyń negizgi kezeńin bastap ketti. Lıseı basshysy Erulan  Jıen­baev osy ýaqytqa deıin mektepte atqarylyp jatqan jumystar jaıly esep berip, aldaǵy ýaqyt enshisindegi «Ulttyq ınovasıalyq mektep modelin» qurý strategıalyq josparymen tanystyrdy.

Keńes músheleriniń barlyǵy qoldap, óz usynys-pikirlerin bildirdi. Keńes tóraǵasy Erkin Mustafauly josparǵa taldaý jasap, jospardyń oryndalý merzimderi men múmkindikterin naqtylap, tolyqtyrýlar men ózgertýler engizý úshin jumys tobyn qurý qajettiligin aıtty. «Aeroǵarysh» komıtetiniń lıseıdi qamqorshylyǵyna alyp, jasalyp jatqan jobalarǵa qoldaý kórsetetinin de eskertti.

Keńes otyrysynan keıin Erkin Musta­fauly lıseı oqýshylarymen kezdesip, quttyqtaý sóz aıtty. Lıseıge óz atynan eki tenıs stolyn syıǵa tartyp, oqýshylarǵa sáttilik tiledi. Fesenkov atyndaǵy Astro­fızıkalyq ınstıtýt dırektory, RhD dok­tory  Bıbosynov Asylǵan myrza oqýshy­larǵa «Qazaqstandaǵy ǵaryshtyq ǵylymı zertteýler men tehnologıalardyń damýy» atty  dárisin oqydy.