Ózbekstannyń Horezm oblysy kásibı avtojol kolejiniń bıologıa pániniń oqytýshysy Zebo Nafasova oqýshyǵa kúsh qoldanǵany úshin qyzmetinen alynǵan.

Áleýmettik jeli arqyly tarap ketken vıdeoda oqytýshy Zebo Nafasova stýdentterdiń kózinshe, 17 jastaǵy Muhammad Jýmanazarovty aıaq kıimimen urady. Tekserý barysynda bul vıdeonyń 12 sáýirde túsirilgeni anyqtalǵan.

Orta arnaıy kásibı bilim beretin oqý ornynyń qyzmetkeri Salohıddın Sanakýlov bul oqıǵadan keıin oqytýshy Zebo Nafasova qyzmetinen alyndy dep habarlady.

Jábirlenýshiniń týysy onyń anasy oqytýshyny kinálamaıtynyn aıtady. «Onyń oıynsha, muǵalim adam bolsyn dep istegen», – deıdi jábir kórgen oqýshynyń týysy.

Horezm oblysyndaǵy Áıelder isi jónindegi komıtet qyzmetkeri Zebo Nafasovanyń sońǵy kezde qatty kúızeliste júrgenin aıtady.

«Birneshe kún buryn onyń kúıeýin esirtki saqtady degen aıyppen ustap áketken. Qazir ol tergeý abaqtysynda. Zebo Nafasovany da tergeýshiler únemi suraýǵa alyp, kúızeliske túsirdi. Biraq kez-kelgen jaǵdaıda, ol stýdentterge qol kótermeýi tıis edi», – deıdi Áıelder isi jónindegi komıtet qyzmetkeri.