feleton

Bizdiń bir tompaq sary qyzymyz bar. Ulty qazaq demeseń, orystyń mátrúshke oıynshyǵynan aýmaıdy. Ózi tentek. Jalǵandy jalpaǵynan basýǵa jany qumar. Ol birdeńeni búldirmese, kádimgideı ýaıymdaıtyn boldyq. «Aqyrzaman jaqyndap qaldy ma?..» dep.

Bir kúni álek-shálegi shyǵyp, shettegi shirkeýlerdiń birinen qýylǵanda, «e, báse...» destik. Biz tanıtyn sary qyz sondaı bolsa kerek. Shirkeýdegiler oǵan: «Sen hrıstıan emessiń. Sondyqtan munda kirýińe bolmaıdy. Shyq!», – degen ǵoı. Týra osylaı aıtqan! Bet-álpeti ózderine kelińkirep tursa da, qulshylyǵyn quptamapty. Biraq, «Men qalaı shoqyný kerektigin biletinimdi, tipti, Ierýsalımdi taýap etkenimdi jáne hrıstıandardyń eń kıeli oryndarynda bolǵanymdy aıttym», – deıdi bizdiń tentek.

Shoqynǵyshyn qaraı gór! Óz aýzymen aıtpaǵanda, men paqyr ondaıǵa sene qoımaýshy edim. Qaýǵa saqal, sholaq balaqty kórshimniń ózi onysyn estigende, «Súf! Súf!» dep jan-jaǵyna úshkirip álektendi. Onyń da qazir tań qalýǵa bolmaıtyndaı áreket jasap otyrǵanyna ılana saldym.

Eger bizdiń ımany kámil elde bireý kisi shoshyrlyq shoý jasap jatsa, ersi qylyǵymen eriksiz kúldire berse, jeke basynyń shoqynǵanyn, shomylǵanyn, sholjyńdaǵanyn kópke jarıa etpeı tura almasa... Ol degeniń – BAQYTSYZDYQ qoı!

Erkeǵalı BOLATULY