Meniń aǵaıyndarymnyń ekinshi jáne úshinshi synypta oqıtyn balalary bar. Solardyń sabaq úlgerimderi jaqsy bolyp kóringenmen, mátindi áli áriptep oqıdy. Nege deseńiz... «Álippeni» qurtyp tynyp, aqsha úshin annan-munnan quralǵan oqýlyq jazǵyshtardyń bastaýysh synyp baǵdarlamasyna ata-analardyń mıy jete bermeıtin tapsyrmalardy engizip qoıǵanyn qospaǵannyń ózinde, qazirgi muǵalimder de bala múmkindigin eskermeıtin bolyp shyqty.

Sonymen, 2-synyp oqýshylaryna synyp jetekshileri Jambyl Jabaev, Abaı Qunanbaev, Muhtar Áýezovtiń portretterin salyp kelińder degen edi. Al olardan sál eresekteý ǵoı dese kerek, 3-synyp oqýshylaryna referat jazdyrtyp qoıdy. «Tapsyrma» damyǵan ústine damyp, jyldyń tórt mezgiline eki-eki shýmaqtan 8 shýmaq óleń jazyp ákelý de júkteldi. Oý, sonda bir synyptaǵy 20-30 balanyń bári aqyn, sýretshi, ǵalym bolǵany ma?!

«Já, qandaı bolsa da, qazaq mektebiniń bir mamany ǵoı» dep, «ǵulamalar ustazyna» ázirge eshteńe aıtpadyq. Bir jaǵynan, oqý jyly da aıaqtalyp qaldy. Al kelesi oqý jylynda balalardy odan saıyn «kemeline keltirip» qoısa, muǵalim turmaq, mektep dırektorynyń aldyna baryp, birdeńe deýge týra keledi. Óıtpesek, ol oqýshylardyń besikten beli shyqpaı jatyp, uly tulǵalardyń beınesin aınytpaı sala almaıtyny barshaǵa aıan. Sýret sabaǵyn ozyq túrde oqytyp, tapsyrmany sol eńbeginiń nátıjesine kóz jetkizip alǵannan keıin berse, bir sári...

Mysaly, álgi úsh sýretti de kitaptaǵy portretterge qarap otyryp, men salyp berdim. Úlken adamnyń qolynan shyqqany taıǵa tańba basqandaı ap-anyq badyraıyp tursa da, anaý bala sol arqyly «bestik» aldy. Tórt mezgilge arnap shyǵaryp bere salǵan óleńderim de «óte jaqsy» dep baǵalandy. Sondaı-aq, ózge synyptastary da bir-bir «besikke» qaryq bolǵan. Shyn máninde, ol baǵalar bastaýysh synyp oqýshylarynyń ózderine emes, ár tapsyrma saıyn barlyǵyna sýret salyp, óleń shyǵaryp berip kelgen eresek týysqandaryna qoıylyp otyrdy. Sony bile tura, sabaq saǵatyn áıteýir ótkizgensip júrgen muǵalimderdiń jaýapkershiligi qaıda?! Bireýdiń arqasynda kóp jaqsy baǵa jınaǵan oqýshylarǵa oqý jyly aıaqtalǵan sátte maqtaý qaǵazyn tapsyrarda, betiniń oty shyqpaı ma eken? Sumdyq qoı, mynalary!

«Referat» degeni de sol – bizdeı «bilimi tasyǵan» pátshaǵarlardyń ınternetten sýyryp alyp bergen 4-5 paraǵy! Áıtpese, «óz erkimen ınternet paıdalanýdy meńgerip, alǵan málimetteriniń basyn qosyp úırensin» derlikteı, qaladaǵy balalardyń bári birdeı kompúterge jaryǵan emes. Al qaptaǵan kompúter klýbtaryna barýlary úshin qaltalaryna únemi qarjy salyp turý kerek. Kópshilik shoǵyrlanǵan orynǵa kishkentaı ul-qyzdy jalǵyz jibere almaıtynyń taǵy belgili. Odan da qasynda mańqıyp otyrmaı, kerek maǵlumattaryn jyldamdatyp ózińniń taýyp alyp bergeniń qolaıly.

...Taıaýda úıge sol 3-synypta oqıtyn ul keldi. «Apaı: «Qazaq mektepteriniń oqý baǵdarlamasy osyndaı. Damyǵan 30 eldiń qataryna kirý úshin bárin qazirden bilýleriń kerek» dep aıtty», – deıdi. Bilgeni qaısy, eger úlkender oryndaǵan aýyr tapsyrmalarǵa maldanyp júrse, onysynan synyp jetekshisi habardar bola tura, joǵary baǵasyn qoıyp qutylýdy ǵana oılap tursa?!.

P.S. Bul – Bilim jáne ǵylym mınıstrligine tikeleı qatysty bylyqtyń tek bir-aq kórinisi. Demek, shynymen de eńsemizdi elý eldiń qatarynan tiktep, oqýymyzdy otyz eldiń qatarynan ońdyryp kórsetkimiz kelse, jetkinshekterimizdiń keleshekte soǵan úlken úles qosýynan úmittensek, ár jastyń shamasyna laıyqtalǵan sabaq túsindire almaıtyn «mamandy» kóbeıtýdiń qajeti joq-aý...

Erkeǵalı BOLATULY