Ál-Farabı atyndaǵy QazUÝ 2020 jylǵa deıin BUU «Akademıalyq yqpal» baǵdarlamasynyń ǵalamdyq habyna jetekshilik etetin boldy. Bul sheshim ýnıversıtettiń turaqty damý salasyndaǵy tabysty basshylyq qyzmetiniń qorytyndysy negizinde qabyldandy.

Birikken ulttar uıymynyń Nú-Iorktegi shtab-páterinde Qoǵamdyq aqparat departamentiniń dırektory, BUU «Akademıalyq yqpal» baǵdarlamasynyń jetekshisi Ramý Damodaran ál-Farabı atyndaǵy QazUÝ rektory, akademık Ǵalym Mutanovqa tıisti sertıfıkatty tabys etti.

2014 jyldan beri ǵalamdyq habty basqaryp kele jatqan QazUÝ jumysyn BUU joǵary baǵalady. R. Damodaran ýnıversıtettiń ózine júktelgen mısıany tıimdi oryndaǵanyn atap ótti. Sondaı-aq jetekshi qazaqstandyq joǵary oqý ornynyń ujymyna zor alǵys bildirip, adamzattyń jahandyq máselelerin sheshýge qosqan úlesi úshin sheksiz rızashylyǵyn jetkizdi.

«Ýnıversıtet BUU-nyń mańyzdy áriptesi jáne turaqty damý boıynsha kóptegen halyqaralyq sharalardyń bastamashysy retinde akademıalyq qaýymdastyqty olardy iske asyrýǵa belsendi túrde tartyp, álemdik deńgeıdegi jobany basqarýda ozyq úlgi kórsetýde. QazUÝ ókilettikterin 2020 jylǵa deıin uzartý týraly sheshim zańdylyq ári Qazaqstannyń úlken jetistigi bolyp tabylady. Bul – halyqaralyq qaýymdastyq múddelerine saı jáne BUU-nyń joǵary seniminiń kórsetkishi», – dedi Ramý Damodaran.

          BUU-nyń «Akademıalyq yqpal» baǵdarlamasy adamzat órkenıetiniń damýyn qamtamasyz etýdiń on qaǵıdasyn júzege asyrý maqsatynda álem ýnıversıtetterin biriktiredi.