Aqtóbede 31 jastaǵy Iýrıı Vasılevti óz áıeliniń sińlisin zorlady degen aıyppen sot 11 jylǵa bas bostandyǵynan aıyrdy.

Sot úkim shyǵarsa da, Iýrııdiń jubaıy onyń kinásiz ekenin alǵa tartady.

«Anam áý bastan-aq otbasyn quratynymyzǵa túbegeıli qarsy boldy. Tipti toıymyzdyń ózinde kúıemim meni Taldyqorǵanǵa alyp ketedi dep qorqatynyn aıtqan bolatyn»,-deıdi sottalǵan er adamnyń jubaıy Irına.

Irına men Iýrıı Martuq aýdanyndaǵy aýyldardyń birinde Irananyń áke-sheshesiniń úıinde turǵan. Olarmen birge taǵy eki kámeletke tolmaǵan qyzdar bolǵan.

«Sińlim burynnan-aq ersi minez-qulyq tanytatyn. Úıge mas kúıinde kelip júretin, tipti biz kúıeýim ekeýmiz ol úıge kóship kelmeı turyp ol jynystyq qatynasta bolǵanyna senimdimin»,-deıdi Irına.

Irınanyń aıtýynsha, onyń kúıeýin qyzdyń otbasy birinshi sátten-aq qabyldamaǵan.

«Ata-anam oǵan daýys kóterip, úı sharýasyndaǵy jumystardy jasaýyn talap etetin. Alaıda kúıeýim janjalǵa jaqyn emes, ár ýaqytta úndemeı bárine tóze beretin»,-deıdi ol.

Keıin erli-zaıyptylar Taldyqorǵanǵa kóship ketken soń, sol jerdegi úılerine polısıa kelip Iýrııdi alyp ketken. Belgili bolǵandaı, Irınanyń anasy Iýrııdiń ústinen aryz jazǵan.

«Anamnyń aryzyna sáıkes, meniń kúıeýim sińlimdi birneshe ret zorlaǵan, tipti, taǵy bir boıjetkenge judyryq jumsaǵan»,-deıdi áıel.

Sottyń sheshimi boıynsha, Iýrıı Vasılev qyzǵa qatysty qylmystyq ister jasady degen aıyppen 11 jylǵa bas bostandyǵynan aıyryldy.

«Olardyń aıtýynsha, Iýrıı sińlimdi eki jylǵa jýyq zorlap kelgen. Alaıda bizdiń ekeýimizdiń otbasyn qurǵanymyzdyń ózine eki jyl tolǵan joq. Ol áke-sheshemniń úıinde jıi bolmaıtyn. Bolsa da, tek meniń qasymda júretin.

Sonymen birge, bul jaǵdaılardan keıin sińlim sabaqqa barmaı júrdi delindi. Biraq mekteptiń kelip-ketý jýrnalynda ol keldi dep tirkelip tur, demek sabaqqa kelip júrgen»,-deıdi Irına.

Onyń aıtýynsha, anasy qyzdardy Iýrııge qarsy aryz jazýǵa ıtermelegen. Sottyń sheshimin ádiletsiz dep tapqan Irına bul jaǵdaıdy BAQ-qa jetkizýge sheshim qabyldaǵan.