SİM baspasóz hatshysy Ánýar Jaınaqovtyń aıtýynsha, tergeý áli júrip jatyr, ázirge eshnárse belgili emes. Jaınaqovtyń sózinshe, qyzdyń ata-anasy Máskeýge barǵan jáne olardyń qasynda qazaqstandyq dıplomattar bar.
21 jastaǵy Tomırıs Baısafa 3 mamyrda Sklıfosovskıı atyndaǵy Máskeý qalalyq jedel járdem ǵylymı-zertteý ınstıtýtynda kóz jumdy. Bul jerge ol 13 sáýir kúni oqý ǵımaratynyń tórtinshi qabatyndaǵy terezesinen qulaǵan soń jetkizilgen.
Reseı Tergeý komıteti bul oqıǵa boıynsha "ózin-ózi óltirýge deıin jetkizý" baby boıynsha qylmystyq is qozǵady. Keıbir aqparattarǵa qaraǵanda, tergeýshiler bul is aıasynda Daǵystannyń burynǵy basshysynyń 22 jastaǵy uly Mýrtýzalı Medjıdovti tergegen. Kýágerlerdiń sózinshe, Medjıdov oqıǵa bolǵanǵa deıin aýdıtorıada Tomırıs Baısafamen birge bolǵan.
Ánýar Jaınaqov qazaqstandyq dıplomattar Tomırıs Baısafanyń máıitin Qazaqstanǵa jetkizýdi uıymdastyryp jatqanyn aıtady.
