«Nur Otan» partıasy Prezıdenttiń bes áleýmettik bastamasynyń júzege asyrylýyn aıryqsha baqylaýǵa alatyn boldy. Tipti osy iste olqylyq jibergen sheneýnikter der kezinde anyqtalady. Bul týraly búgin Bes áleýmettik bastamanyń júzege asyrylýyn baqylaý jónindegi Qoǵamdyq keńestiń alǵashqy otyrysynda Máýlen Áshimbaev aıtty.
«Qoǵamdyq keńes Elbasynyń tikeleı tapsyrmasy boıynsha partıanyń muryndyq bolýymen qurylyp otyr. Keńestiń jumysyna erekshe mán berilip otyr. Biz Prezıdenttiń bes áleýmettik bastamasyn júzege asyrýda nemquraıdylyq tanytqan kez kelgen sheneýnikti der kezinde anyqtaımyz. Qajet bolsa «Nur Otan» partıasy ondaı sheneýnikterdi jaýapqa tartý máselesin de kóteretin bolady. Biz eshkimge Elbasy bastamalaryn sózbuıdalyqqa salyp, kesheýletýge jol bermeımiz», – dedi Máýlen Áshimbaev.
«Nur Otan» partıasy Tóraǵasy Birinshi orynbasarynyń aıtýynsha, Qoǵamdyq keńes atalǵan jumys boıynsha aqparattardy túrli derek kózderinen alyp otyrady. Atap aıtqanda, memlekettik organdar, qoǵamdyq birlestikter, úkimettik emes uıymdar, sarapshylar jáne qarapaıym halyqpen tyǵyz jumys isteý arqyly Keńes Elbasy bastamalarynyń oryndalý barysyn qatań baqylap otyrmaq. Osy rette halyq qajetti aqparattardy qoǵamdyq qabyldaý bólmesi, partıanyń veb-saıtyndaǵy arnaıy «5bastama» aıdary nemese jedel jeli arqyly habarlasyp bere alatynyn atap ótken jón.
Aıta keteıik, búgin Astanada Prezıdenttiń bes áleýmettik bastamasynyń» júzege asyrylýyn baqylaý jónindegi Qoǵamdyq keńes qurylyp, onyń alǵashqy otyrysy ótti. Keńes quramyna elimizdegi jetekshi saıası partıalardyń basshylary, úkimettik emes uıymdar men Qazaqstan halqy Assambleıasynyń ókilderi, belgili qoǵam qaıratkerleri, belsendi azamattar jáne sarapshy mamandar múshe boldy. Keńes tóraǵasy bolyp belgili memleket qaıratkeri, Senat depýtaty Baqytjan Jumaǵulov taǵaıyndaldy.
Jıyn barysynda ortalyq jáne jergilikti memlekettik organdardyń jetekshileri sóz alyp, Bes áleýmettik bastamany júzege asyrýdaǵy búgingi ahýal jáne baǵdarlamanyń oryndalýyn baqylaý jónindegi arnaıy monıtorıńtik top qurý jaıynda aıtyp berdi.
