Eki eldiń kóshbasshylary birin-biri Uly Otan soǵysyndaǵy Jeńistiń aldaǵy merekesimen quttyqtady.
Áńgimelesý barysynda Qazaqstan men Reseı Prezıdentteri ekijaqty yntymaqtastyqtyń qazirgi jaǵdaıy men perspektıvalaryn, sondaı-aq óńirlik jáne halyqaralyq kún tártibindegi ózekti máselelerdi, sonyń ishinde Armenıadaǵy ahýaldy talqylady.
Memleketter basshylary aldaǵy kezdesýler kestesi, atap aıtqanda, bıylǵy 14 mamyrda Sochı qalasynda ótetin Joǵary Eýrazıalyq ekonomıkalyq keńestiń otyrysyna ázirlik barysy jóninde áńgimelesti.
Osy oraıda, eki eldiń kóshbasshylary Eýrazıalyq ekonomıkalyq odaqtyń 2017 jylǵy ishki jáne syrtqy saýda-sattyq kólemi tıisinshe 24,4 jáne 26,1 paıyzǵa óskenin atap ótip, halyqaralyq qoǵamdastyq tarapynan bul birlestikpen yntymaqtastyqty damytýǵa qyzyǵýshylyqtyń artyp otyrǵanyn aıtty.
Jalpy eki el basshysy Qazaqstan men Reseı arasyndaǵy saıası-dıplomatıalyq baılanys pen saýda-ekonomıkalyq barys-kelis týraly jıi telefonda sóılesip turady.
Buǵan deıin telefon arqyly sóılesýge Reseı jaǵynyń bastamashy bolýymen 18 sáýirde Nursultan Nazarbaev Reseı Federasıasynyń Prezıdenti Vladımır Pýtınmen telefon arqyly sóılesken. Onda memleketter basshylary ekijaqty yntymaqtastyqqa qatysty, sondaı-aq óńirlik jáne halyqaralyq kún tártibindegi ózekti máselelerdi, sonyń ishinde Sırıadaǵy ahýaldy talqylady.
Sondaı-aq, eki el basshysy aqpan aıynda da telefonda sóılesken bolatyn. Onda bıylǵy 29-30 qańtarda Sochıde ótken Sırıa ulttyq dıalogy kongresiniń qorytyndylaryn talqylady. Qazaqstan prezıdenti Sırıa daǵdarysyn retteý úderisine Reseı Federasıasynyń qomaqty úles qosqanyn atap ótti.
Memleketter basshylary Almaty qalasynda ótken Eýrazıalyq úkimetaralyq keńes otyrysy men "Jahandyq dáýirdegi sıfrlyq kún tártibi" atty forým týraly oı bólisip, Eýrazıalyq ekonomıkalyq ıntegrasıa aıasyndaǵy Qazaqstan-Reseı yntymaqtastyǵy jóninde áńgimelesti.
Prezıdentterdiń bir-birine ózara qurmeti de erekshe. Jańadan saılanyp, kezekti prezıdenttik qyzmetine kiriskeli otyrǵan Pýtın Nursultan Nazarbaevty aıryqsha qadirleıdi.
Qazaqstan Respýblıkasy Prezıdenti Teleradıokesheniniń bas dırektory Erlan Bekhojın Reseı Federasıasynyń Prezıdenti Vladımır Pýtınmen suhbattasty, onda Reseı prezıdenti Nursultan Nazarbaevtyń kóshbasshy retindegi aıryqsha erekshelikterin atap ótti.
«Birinshiden, ol óte isker jáne talapty adamdarmen, jastarmen uıymshyldyqta qalaı jumys isteýdi biledi. Ol eshqashan myqty adamdardan qoryqpaıdy. Bul kez kelgen kúshti kóshbasshynyń ereksheligi », - dedi Pýtın.
