Qazirgi elimiz rýhanı jańǵyrýǵa bet alǵan kezeńde ultymyzdyń tarıhy men mádenıetin, óneri men ádebıetin álem jurtshylyǵyna tanystyrý, úzdik shyǵarmalardy nasıhattaý mańyzdy mindetterdiń biri.
Ústimizdegi jyldyń 25 sáýir jáne 1 maı aralyǵynda Birikken Arab Ámirlikteriniń astanasy Abý-Dabı qalasynda 2018 jylǵy Abý-Dabı halyqaralyq kitap kórmesi ótti. Bıylǵy jyly kórmege 63 elden 1500 qatysýshy qatysty. Kórmeniń ashylýynda Birikken Arab Ámirlikteri Syrtqy ister mınıstri Sheıh Abdýlla ben Zaıed ál-Nahaıan bıylǵy jyldyń qurmetti qonaǵy - Polsha eliniń stendin saltanatty túrde ashty. Polsha delegattary quramynda avtorlar, zıaly qaýym ókilderi jáne sýretshiler, mýzykanttar, aspazdar boldy. Olar polák ádebıetiniń altyn klasıkasy men Nobel syılyǵy laýreattarynyń shyǵarmalaryn, sondaı-aq qazirgi zamanǵy shyǵarmalar, ádebı shyǵarmalar arqyly polák mádenıetin, dástúrin, ótken kezeńin jáne qazirgi dınamıkalyq damýyn arab halqyna jan-jaqtyly tanystyrdy. Kásibı baǵdarlama kezinde polák kitaptar naryǵy men aýdarma, avtorlyq quqyqtardy basqarý sóz boldy. Balalarǵa arnalǵan is-sharalarǵa polák ártisteri men ustazdary óner kórsetti, aspazshylar ulttyq taǵamdarynyń tarıhyn túsindirdi.
Atalmysh kórmege Qazaqstan Respýblıkasynyń Ulttyq kitaphanasy, Baspagerler, polıgrafıster jáne kitap taratýshylar qaýymdastyǵynyń uıymdastyrýymen qazaqstandyq bir top baspa isiniń mamandary qatysty.
Qazaqstandyq delegasıa quramynda «Dáýir» RPBK dırektory Svetlana Nazarbaeva, komersıalyq dırektory Baljan Rakısheva, QR Ulttyq kitaphanasy Syrtqy baılanystar jáne frandraızıng tobynyń jetekshisi, BPKA Jobalar boıynsha dırektory Baıan Qabylash, «Qazaq ensıklopedıasy» baspasynyń dırektory Jadyra Toıbaeva, «By production» dırektory Marjan Sádýaqasova, aýdarmashy Perızat Qaırat, t.b. qatysty. Qazaqstan stendinde qazaq, aǵylshyn, arab tilderinde 200-ge jýyq basylym kórme qatysýshylarynyń nazaryna usynyldy. Onda kórkem ádebıettermen qatar balalarǵa arnalǵan kitaptar, oqýlyqtar, qujattamalyq-derekti basylymdar bar.
Kórmeniń birinshi kúni, Abý-Dabı Mádenıet jáne týrızm basqarmasynyń arnaıy shaqyrýymen «Dáýir» Respýblıkalyq baspa polıgrafıa kesheniniń dırektory Svetlana Nazarbaeva kásibı baǵdarlamaǵa qatysyp, «Mádenıet. Kitap isi: Qazaqstandaǵy turaqty damý jolyndaǵy qozǵalys» atty baıandama jasady. Baıandamaǵa elshiler, dıplomattar, arab eliniń zıaly qaýym ókilderi qatysyp, Qazaqstannyń mádenıeti, tabıǵaty, salt-dástúri jáne baspa salasynyń tarıhy men jetistikteri týraly tolyq maǵlumat aldy.
Bul sharaǵa Qazaqstannyń Birikken Arab Ámirlikterindegi Elshisi Qaırat Lama Sharıf myrza tikeleı qoldaý bildirip, kórmeniń sátti ótýine barlyq jaǵdaıdy jasady. Bul kitap kórmesi Qazaqstan men BAÁ arasyndaǵy mádenı, rýhanı baılanystardy nyǵaıtý baǵytyndaǵy naqty qadamdardyń biri boldy deı alamyz.
30 sáýir kúni Sheıh Zaıed kitabynyń jeńimpazdary resmı medaldarmen marapattaldy. Saltanatty rásim Saadiyat araldaryndaǵy mádenı keńistiktegi «Manarat-ál-Saadıı» kórmesinde ótti, onda Lývr Ábý-Dabı jáne Zaıed ulttyq murajaıy ornalasqan. Abý-Dabı Týrızm jáne mádenıet basqarmasynyń keńesshisi Saıf Saıd Gobash qatysýshylarǵa Sheıh Zaıed kitaby marapaty maqsatynyń mádenı kópirdi qalyptastyrý ekendigine toqtaldy. Ol BAÁ-niń dinine nemese túsine qaramaı, adamzatty baılanystyrýdaǵy jumysyn maqtan tutatynyn atap aıtty. Sheıh Zaıed kitaby marapatynyń Bas hatshysy doktor Alı Bın Tamım, Sheıh Zaıed ben Sultan Ál Nahaıandy eske alyp, Sheıh Zaıedtiń óleńderinen, sózderinen úzindiler keltirdi, jyly lebizderin bildirdi. Birikken Arab Ámirlikteri Premer-Mınıstriniń orynbasary, Prezıdent isteri jónindegi mınıstri Sheıh Mansur ben Zaıed ál-Nahaıan 2018 jyldyń jeńimpazdarynyń syılyǵyn usyndy. Árbir jeńimpaz 750 000 dırham (204 000 AQSH dollary) syılyǵyna ıe bolady, al «Jyldyń mádenı adamdary» nomınasıasynyń jeńimpazy 1 mıllıon dırham (272 myń AQSH dollary) alady. 2018 jyly Zaıedtiń 100 jyldyq mereıtoıyn atap ótý úshin BAÁ-degi Zaıed jyly dep belgilendi.
Qazaqstan Respýblıkasy Ulttyq kitaphanasynyń Syrtqy baılanystar jáne fandraızıng tobynyń top jetekshisi Baıan Kabylash 2018 jylǵy «Sheıh Zaıed» kitaby marapattaýynyń «Balalar ádebıeti» nomınasıasy boıynsha laýreaty Hessa Ál Mehaırı hanymmen
Mine, osy aıtylǵandardy túıindeı kele, mundaı is-sharalar Qazaqstan Respýbıkasy men Birikken Arab Ámirlikteri arasyndaǵy mádenı, rýhanı baılanystardyń jańa kezeńine qadam basqandyǵyn ańǵartady deı alamyz.
