Shyǵys Qazaqstan oblysynda baýyryn qorǵaımyn dep eki adamǵa oq atqan polıseıge qatysty sot úkimi shyqty. Bul týraly jergilikti altaynews.kz portaly habarldy.

Aıta keteıik, bul oqıǵa sáýirdiń basynda Katonqaraǵaı aýdanynyń Úlken Naryn aýylynda oryn alǵan. Oq atqan eki adamnyń biri aýyr jaraqattalyp, ekinshisi kóz jumǵan bolatyn. Buǵan deıin adam ólimine qatysty sot isi qaralyp, úkim shyǵarylyp qoıǵan.

2 sáýirde Marat M. qyzmetine kirisken edi. Kúndiz baýyry habarlasyp, birneshe er adam jabylyp, ony soqqyǵa jyqqanyn aıtady. Olardyń biri qazir tehnıkalyq baıqaý stansasynda júrgenin estigen Marat M. baýyryn ertip, tabeldi  «Makarov» qarýyn alyp, jeke kóligimen mejeli jerge barady.

Oqıǵa ornynda eki jaqtyń arasynda janjal týady. Qarsylastaryna toıtarys beremin degen oımen Marat M. aýaǵa oq atqan. Al bul áreketke jaýap retinde qarsylastarynyń biri ańshylyq sholaq myltyqty onyń baýyryna kezeıdi. Endigi kezekte Marat M. qarýly jábirshiniń ozbyrlyǵyn týra atylǵan oqpen toqtatady. Degenmen, jaralanǵan er adam polıseıdiń baýyryn da aıaǵynan jaraqattap úlgeripti.

Sotta qaralǵan materıaldar boıynsha Marat M. Qylmystyq Kodekstiń 112-babynyń 1 bólimi (Qajetti qorǵanys sheginen shyǵý kezinde jasalǵan, densaýlyqqa qasaqana aýyr zıan keltirý) boıynsha kináli dep tabylyp, buryn taǵaıyndalǵan jazaǵa qosymsha segiz aı qosylyp otyr. SHQO qylmystyq ister jónindegi mamandandyrylǵan aýdanaralyq sotynyń úkimin esepke alǵanda, barlyǵy 15 jyl jáne 7 aı bas bostandyǵynan aıyrý jazasy taǵaıyndaldy.

Zańdy belden basqan polısıa qyzmetkeri jazasyn qylmystyq atqarý júıesiniń qaýipsizdigi barynsha joǵary mekemesinde óteıtin bolady. Sondaı-aq, sot jábirleýshiden jábirlenýshige aınalǵan er adamnyń paıdasyna 500 000 teńge kóleminde moraldyq zalaldy óndirý týraly sheshim qabyldady.