Qazaqstannyń Bala quqyqtary jónindegi ýákili Zaǵıpa Balıeva jel ushyrǵan batýtta balalardyń zardap shegýi oqıǵasyna qatysty pikir bildirdi.

«Jaýapkershilik batýt ıeleriniń moınynda. Olar arnaıy erejeni saqtaý kerek edi. Tekserý bolady. Men Astana ákimdigine, TJD-ǵa hat daıyndap jatyrmyn. Biz oıyn alańdary men avtomattaryn ornalastyrý erejeleri men talaptaryn oryndaýy boıy birlesken tekserý júrgizemiz. Biz elimizdiń barlyq aýmaǵynda tekserý júrgizýge bastamashylyq etpekpiz», - dep habarlady Z.Balıeva QazAqparat tilshisine.

Onyń aıtýynsha, oıyn atraksıondaryn ornatý kezinde óńirdiń klımattyq jaǵdaıyn mindetti túrde esepke alý kerek.

«Bul bárimizge sabaq boldy, ár eldi mekenniń tabıǵı jaǵdaıy eskerilý kerek. Astanada jıi jel turady, sondyqtan batýtty ornatý kezinde osyny nazarǵa alý qajet. Onyń ıeleri de oıyn avtomattary men alańdardy ornatý kezinde eń aldymen balalardyń qaýipsizdigin esepke alýlary tıis», - dep atap ótti ol.

Sonymen qatar, Z.Bálıeva mundaı jaǵdaıda barlyǵy, sonyń ishinde aýa raıynyń qolaısyzdyǵy týraly bilmegen ata-analar da jaýapty ekendigin atap ótti.

«Barlyǵy abaı bolýy kerek: ıeleri de, ata-analar da, búkil qoǵam da. Jel soǵatyny týraly barlyǵy bildi. Ata-analar batýtty myqtap bekitkendigine úmittengen. Olar, óz kezeginde barlyq jaǵdaıdy esepke alǵan joq. Olar aýa raıy týraly aqparat alǵan kezde batýttyń bekitilgendigine taǵy bir ret zer salýlary tıis edi», - dedi ol.

Eske salaıyq, «Jannur» saýda ortalyǵynyń aýmaǵynda balalar oınap júrgen batýtty jel ushyryp jibergen. QR İİM TJK deregi boıynsha, batýt bekitilgen jerden 20 metrge deıin ushyp ketken. Sonyń saldarynan bes bala túrli jaraqat alyp, aýrýhanaǵa jetkizildi. №2 qalalyq balalara aýrýhanasy dárigerleriniń aıtýynsha, tórt bala aýyr hálde jatyr