Uly Jeńis merekesiniń 73 jyldyǵy qarsańynda Otyrar aýdanynyń ákimi Aıtahanov Erlan Qýanyshuly Uly Otan soǵysy ardagerleri Seıdahan Dáýrenbekov, Nesipbaı Nahypov pen Turǵanbaı Sábıtovtiń jáne Hadısha Bekqulıeva ájeniń shańyraqtaryna baryp, tarıhı merekemen quttyqtady.
Tek mereke kezinde ǵana emes, urpaq balasynyń jarqyn bolashaǵy úshin janqıarlyqpen erlik kórsetip, jastyq ómirin maıdan dalasynyń ómir men ólim arasyndaǵy arpalysyna arnap, patrıottyq sezimniń jarqyn úlgisin kórsetken ardaqty jandardyń jaǵdaıy men tynys-tirshiliginen habar alyp, otbasylaryna jıi bas suǵyp otyratyn aýdan basshysyna qarıalar da sheksiz alǵysyn bildirip, aq batalaryn berip jatty.
Zulmat shaqta Otyrar aýdanynan 4000-nan asa azamat urys alańyna attansa, qazirgi tańda, úsh Uly Otan soǵysy ardageri men tórt júz jıyrma jeti tyl eńbekkeri bar.
"Erlik pen qaısarlyqtyń, ójettiktiń arqasynda qasyq qany qalǵansha jaýymen aıqasyp, bolashaǵyna kóz tikken teris pıǵyldan el erteńin azat etý jolynda patrıottyq rýhynyń asqaqtyǵyn kórsetken qarýlas dostardyń árqaısysynyń beınesi kóz aldymda. Aq qar, kók muzda týǵan jer topyraǵyna jete almaı kóz jumǵany da qanshama. Biz kórgen soǵysty urpaǵymyz kórmesin. Elimizdiń beıbit ómiri máńgilik bolsyn! Bozdaqtardyń erligimen kelgen baqytty ómirdiń qadirin uǵynyp, amanatyna adal bolý árbir azamattyń basty mindeti"-dep, 96 jastaǵy Nahypov Nesipbaı qarıa soǵys jyldaryn eske aldy.
El ardaqtylaryna oblys ákimi Túımebaev Janseıit Qanseıitulynyń da izgi tilegi men syı-sıapatyn tabys etken aýdan ákimi ardagerlerdiń ıyǵyna zerli shapan, asyl ana basyna aq oramal jaýyp, búgingideı beıbit kúnniń jolynda zulym jaýmen jan aıamaı shaıqasyp, tylda da kúni-túni tynbaı eńbek etken abzal jandarǵa perzentterimen birge baqytty da baıandy ǵumyr súrýlerine tilektestik bildirdi.
Sonymen qatar, Otyrar aýdanynda aıtýly merekelerge oraı aýyl sharýashylyǵy men jergilikti taýar óndirýshileri ónimderiniń jármeńkesi uıymdastyryldy.
Merekelik jármeńkede kásipkerler men dıhandar turǵyndardyń kúndelikti turmysyna qajetti azyq-túlik jáne aýyl sharýashylyǵy ónimderin naryqtaǵy baǵadan 10-15 paıyzǵa tómen baǵada usyndy. Tańerteńnen bastalǵan ıgi sharada qus eti men jumyrtqa, balyq ónimderimen qatar, kartop, qyzanaq, et-sút, qymyran ónimderine suranys artty.
Otyrar aýdanynda azyq-túlik ónimderiniń jármeńkesin turaqty túrde ótkizý dástúrge aınalǵan. Aıtýly bastamaǵa halyqtyń da aıtar alǵysy mol.
Sondaı-aq, otyrarlyqtar 7 mamyr - Otan qorǵaýshylar jáne 9 mamyr-Uly Jeńis kúni merekelerine erekshe daıyndyq ústinde. Jalpy aýdandyq deńgeıde uıymdastyrylatyn sharada kóptegen tárbıelik-tanymdyq baǵytty aıqyndap, árbir janǵa erekshe oı salarlyq jańasha baǵdarlamalar keń kólemde daıyndalýda.
