Elorda ákimi Áset Isekeshev «Jannur» SÚ alańynda ornatylǵan batýtta oınap, zardap shekken balalardyń hal-jaǵdaıyn bilý maqsatymen qalalyq №2 balalar aýrýhanasyna bardy.
Balalardyń ata-analarymen áńgimelesý barysynda Áset Isekeshev qala bıligi, İİD men TJD-niń oqıǵany óz baqylaýyna alǵandyǵyn alǵa tartty.
Ol, sondaı-aq, kinálilerdiń jazaǵa tartylatyndyǵyn aıtty.
Esterińizge salaıyq, oqys oqıǵa keshe, 4 mamyrda saýda úıi mańynda oryn aldy. Ústinde balalar oınap jatqan batýt jelmen ushyp ketken bolatyn. 5 bala shuǵyl túrde aýrýhanaǵa jetkizildi.
Astana qalasy ákimdiginiń suraýy boıynsha balalardy úzdik mamandar («Neırohırýrgıa ǵylymı ortalyǵy» AQ tóraǵasy Serik Aqshulaqov pen Travmotologıa jáne ortopedıa ǴZI -nyń dırektory Nurlan Batpenov), sondaı-aq, Ana men bala ulttyq ǵylymı ortalyǵynyń dárigerleri kútýde.
Elorda polıseıleri QR QK 306 babynyń 2 tarmaǵyna (qaýipsizdik talaptaryna saı kelmeıtin qyzmet kórsetý) sáıkes sotqa deıingi tergeýdi bastap ketti.
Aıta keteıik, 2018 jyldyń 3 mamyrynda tótenshe jaǵdaılar departamenti jeldiń kúsheıetindigi týraly habarlandyrýdy taratqan bolatyn.
Batýt ornatylǵan alań joǵaryda atalǵan saýda úıine tıesili.
Elorda ákimdigi qalanyń saýda jáne oıyn-saýyq ortalyqtarynyń alańyna atraksıondardy ornatýǵa ruqsattamalardy bermeıdi.
Kásipkerlik sýbektileri sharýashylyqty júrgizetin eki sýbektiniń arasyndaǵy jalǵa alý jónindegi kelisim-sharttyń negizinde ǵana batýttardy SOSO jáne saýda ortalyqtarynyń alańdarynda ornalastyrady.
Bul tusta zańdy tulǵa, ıaǵnı saýda ortalyǵy ıesiniń jarǵysymen nysan janyndaǵy alańdy jalǵa berý tetigi de qarastyrylýy qajet.
Eske salsaq, qazirgi tańda bıznes qyzmetine aralasý shektelip otyr. Degenmen, kásipkerlik sýbektileri (SOSO, qoǵamdyq tamaqtaný oryndary jáne t.b) kelýshilerdiń yńǵaılylyǵy úshin olardy qaýipsizdikpen qamtamasyz etýge barynsha nazar aýdarýy tıis.
Qala ákimdigi ata-analardy qyraǵylyq tanytyp, qutqarýshylardyń taratqan habarlamasyn nazarǵa alýǵa, qatty jel kezinde balalardyń dalaǵa shyǵýyna jol bermeýge shaqyrady.
