Memleket basshysy Qurmetti qaraýyldyń sap túzeýimen Dańq memorıalyndaǵy máńgilik alaýǵa gúl shoǵyn qoıyp, bir mınýttyq únsizdikpen ekinshi dúnıejúzilik soǵysta qaza tapqandardyń rýhyna taǵzym etti.

Elbasy ardagerler men rásimge qatysýshylarǵa arnalǵan quttyqtaý sózinde qazaqstandyqtardyń fashısik basqynshylardy jeńýge zor úles qosqanyn erekshe atap ótti.

– Qazaqstan maıdanǵa 1 mıllıon 800 myńnan astam jaýynger attandyrdy. Solardyń jartysy qaıtyp oralmady. Olar soǵysta eren erlik kórsetti. 500 otandasymyz Keńes Odaǵynyń Batyry atandy. Tyl eńbekkerleri maıdandy qarýmen, azyq-túlikpen jáne kerek-jaraqpen qamtamasyz etý úshin kúndiz-túni tynymsyz jumys istedi, – dedi Nursultan Nazarbaev.

Qazaqstan prezıdenti surapyl soǵysty kórmegen qazirgi urpaqtyń baqytty ekenin aıtty.

– Bizdiń atalarymyz revolúsıa men repressıany, al ákelerimiz Uly Otan soǵysyn bastan ótkerdi. Tek bizdiń urpaq qana beıbit zamanda ómir súrýde. Buǵan ardagerlerimizdiń qosqan úlesi zor. Sizderge alǵysymyz sheksiz! – dedi Memleket basshysy.

Rásim sońynda Elbasy soǵys jáne eńbek ardagerlerimen beıresmı túrde áńgimelesti.

– Sizder janymyzda bolsańyzdar, bizder – balalaryńyz ben nemerelerińiz ózimizdi alańsyz sezinemiz. Erlikterińizdi úlgi-ónege tutyp, sizderden qaısarlyqty, Otanymyzdyń patrıoty bolýdy, Atamekendi súıýdi, sondaı-aq Otanymyz úshin qasyq qanymyz qalǵansha kúresip, súıikti Qazaqstanymyz úshin janymyzdy qurban etýdi úırenemiz. Qymbatty dostar, barshańyzdy merekelerińizben quttyqtaımyn! Sizderge zor densaýlyq, tabys jáne bar jaqsylyqty tileımin! – dedi Qazaqstan Prezıdenti.

Maıdangerler Nursultan Nazarbaevqa erekshe iltıpaty men qamqorlyǵy úshin shynaıy rızashylyǵyn bildirdi.