Uly Otan soǵysy jyldarynda qazaqstandyq jaýyngerler eren erliktiń jarqyn úlgisin kórsetti. Sonyń nátıjesinde 500-ge jýyq otandasymyz Keńes Odaǵynyń Batyry atandy. Alaıda, bul tizimniń budan da kóp bolýy ábden múmkin edi. Sebebi, taǵy da 100-ge jýyq otandasymyz osyndaı eń joǵary nagradaǵa usynylyp, túrli sebepterge baılanysty ol marapattaryna qol jetkize almady. Tipti olardyń nagradaǵa usynylǵanyn dáleldeıtin marapat paraqtary da tabylyp, naqty derektermen dáleldengen. Osyǵan oraı «Nur Otan» partıasy osyndaı ardager atalarymyzǵa taǵzym retinde olardyń urpaqtarymen kezdesip, qoldaý kórsetý maqsatynda «Erlik eshqashan umytylmaıdy» atty arnaıy aksıany qolǵa aldy.

Búgin osy aksıa aıasynda partıa Tóraǵasynyń Birinshi orynbasary Máýlen Áshimbaev Astana qalasynda Keńes Odaǵynyń Batyry ataǵyna usynylyp, altyn juldyzyn ala almaı ketken Amansha Meńdiǵalıev atamyzdyń shańyraǵyna arnaıy baryp, onyń urpaqtarymen kezdesti.

Amansha ata áıgili Panfılov dıvızıasynyń quramynda Máskeý túbindegi qıan-keski urysqa qatysqan. Aýyr jaraqatyna qaramastan 362-shi ózdiginen júretin artılerıa polkin bastap Berlınge deıin jetedi. Sol jerde Amansha atamyzdyń batareıasy jaý áskerine oısyrata soqqy berip, nátıjesinde Keńes áskeri Germanıa astanasynyń shyǵys bóligine basyp kirýge múmkindik alady. Osy erligi úshin ol birden Keńes Odaǵynyń Batyry ataǵyna usynyldy. Alaıda sol bir altyn juldyzǵa qol jetkize almaı ketti. Biraq erlik eshqashan umytylmaıdy. Táýelsizdik alǵannan keıin Elbasynyń Jarlyǵymen Amansha Meńdiǵalıevke «Otan» ordeni saltanatty jaǵdaıda tabys etildi. Jeti bala tárbıelep ósirgen ardager atamyz 28 nemere súıdi. Amansha ata 2008 jyly 90 jasynda dúnıeden ozdy.

Búginde batyrdyń otyn óshirmeı, qarashańyraqta uly Asylbek Meńdiǵalıev otyr. Ol da áke jolyn jalǵap, áskerı ómirdi tańdaǵan. Óz sózinde «Nur Otan» partıasy Tóraǵasynyń Birinshi orynbasary nurotandyqtar jańa bastama arqyly tarıhı ádilettilikti qalpyna keltirip, ardagerlerdiń ózderi kóre almaı ketken qurmetti búgingi urpaqtaryna kórsetý arqyly jastardy otansúıgishtikke baýlýdy kózdeıtinin jetkizdi.

– Biz adamzat tarıhyndaǵy eń qanquıly soǵysta qazaqstandyqtardyń Uly Jeńisti jaqyndatýǵa ólsheýsiz úles qosqanyn eshqashan umytpaýymyz kerek. Sondyqtan «Erlik eshqashan umytylmaıdy» atty arnaıy aksıany qolǵa alyp otyrmyz. Búgin osy bastama aıasynda nurotandyqtar elimiz boıynsha qaıtpas qaısarlyqtyń jarqyn úlgisin kórsetse de ózine tıesili batyr ataǵyn ala almaı ketken ardagerlerdiń shańyraqtaryna arnaıy baryp, olardyń urpaqtaryna qurmet kórsetýde. Partıa tarapynan osyndaı ardagerlerdiń esimderin mektepter men kóshelerge berýge qatysty da tıisti jumystar júrgiziletin bolady. Buny óskeleń urpaqqa eren erlikti dáripteıtin ıgi is dep esepteımin. Sondyqtan bizder óz batyrlarymyzdyń erlikterin máńgilik jadymyzda saqtap, olarǵa laıyqty qurmet kórsetýge tıispiz, – dedi Máýlen Áshimbaev.

Ótken merekelik kúnderde «Erlik eshqashan umytylmaıdy» aksıasy aıasynda nurotandyqtar elimiz boıynsha 8 ardagerdiń otbasyna arnaıy baryp, olardyń urpaqtarymen kezdesti. Amansha Meńdiǵalıevpen birge bul qatarda atyraýlyq Jámılá Jumasheva, shyǵysqazaqstandyq Baltabek Jetpisbaeva, tarazdyq Ibraım Súleımenov, qostanaılyq Qasym Ahmetov, aqtaýlyq Isataı Súıeýbaev jáne pavlodarlyq ardagerler Sembaı Qalıev pen Qabysh Kóktaev bar. Bular joǵary nagradaǵa usynylyp, sol marapatyn ala almaı ketken ardager ata-ájelerimiz. Aldaǵy ýaqytta partıanyń qoldaýymen osy baǵyttaǵy jumystar odan ári jalǵasyp, joǵaryda aıtqan júzden astam ardagerdiń bári anyqtalatyn bolady. Osy bastamanyń nátıjesi retinde «Erlik eshqashan umytylmaıdy» atty kitap basylyp shyǵarylmaq. Oǵan atalǵan ardagerler týraly jan-jaqty málimetter, olardyń erlikteri jaıynda tyńǵylyqty derekter enetin bolady.

Sonymen qatar «Nur Otan» partıasy Tóraǵasynyń Birinshi orynbasary búginde Astana qalasynda turatyn ózge de Uly Otan soǵysy ardagerleriniń úılerine arnaıy baryp, Jeńis kúnimen quttyqtady. Atap aıtqanda, partıa tarapynan áıgili Kýrsk shaıqasyna qatysyp, Harkov, Kıev qalalary men Polshany jaýdan azat etken, bıyl 97 jasqa tolatyn Seıilbek Ýsın ata men soǵys jyldary gospıtálde jumys istegen, maıdanǵa azyq-túlik pen dári-dármek jiberý jumystaryna da aralasyp, keıin 2-shi Ýkraına frontynda qyzmet etken Ekaterına Pısareva ájeıge qurmet kórsetildi. Jalpy mereke kúni nurotandyqtar elimiz boıynsha eki myńnan astam Uly Otan Soǵysy ardageriniń úılerine arnaıy baryp quttyqtaǵanyn atap ótken jón.