Beısenbide Astana men Almatyda "Saıası tutqyndarǵa bostandyq!" degen talappen ondaǵan adam kóshege shyqty. Ruqsat etilmegen aksıany taratqan polısıa ondaǵan narazyny ustap áketti, dep jazady Azattyq.
Mamyrdyń 10-y kúni tańerteńgi saǵat 11-ge qaraı Astanadaǵy birneshe eýropalyq eldiń dıplomatıalyq ókildikteri ornalasqan ǵımarattyń aldyna jınalǵan ondaǵan azamat "Saıası bostandyqtarǵa bostandyq!", "Bostandyq!", "Masqara!" dep aıǵaılady. Olar saıası astar boıynsha sottalǵan dep sanaıtyn tutqyndarǵa bostandyq berýdi Qazaqstan bıliginen talap etti.
Azattyq tilshileriniń oqıǵa ornynan habarlaýynsha, bılikke talap aıtqan adamdar jınalǵan jerge kelgen polısıa qyzmetkerleri men arnaıy jasaq ondaǵan narazy azamatty kólikke kúshtep salyp alyp ketti.
Dál osyndaı narazylyq aksıasy Almatydaǵy Qabanbaı batyr men Panfılov kósheleriniń qıylysyndaǵy opera jáne balet teatry janyna jınaldy. Olar qoldaryna qazaqstandyq quqyqqorǵaýshylar saıası tutqyndar sanatyna jatqyzǵan adamdardyń portretterin ustap, bıliktiń olarǵa bostandyq berýdi jáne azaptaýdy toqtatýdy talap etip shyqty.
Polısıa Astana men Almatyda kóshege ruqsat etilmegen aksıaǵa shyqqandardy taratyp, keıbireýlerin ustap áketti. Azattyq tilshisiniń habarlaýynsha, Almatydaǵy aksıadan 70-ten astam adamdy polısıa ustaǵan. Ustalǵandardyń arasynda jıyn ótip jatqan jerden kezdeısoq ótip bara jatqan adamdar da bolǵan.
Oqıǵa ornynda júrgen Azattyq tilshileriniń bılikke talap aıtyp jınalǵan azamattardy ne úshin ustaǵany týraly suraǵyna polısıa sheneýnikteri jaýap berýden bas tartty. Astanalyq polısıa ókili "keıinirek komentarı beriletinin" aıtsa, Almatyda polısıa qyzmetkerleri jýrnalıserge Almaty qalalyq ishki ister departamenti baspasóz qyzmetinen suraýǵa keńes berdi. Oqıǵa bolyp jatqan jerde prokýratýra ókilderi kórinbedi.
Buǵan deıin quqyqqorǵaýshylar Qazaqstanda sot qyzmetine tyıym salǵan "Qazaqstannyń demokratıalyq tańdaýy" qozǵalysynyń bastamasymen ótedi dep josparlanǵan narazylyq aksıasy qarsańynda ondaǵan azamattyq belsendi men qatardaǵy turǵyndardy polısıaǵa shaqyrtqany nemese bılik ókilderi jetkizgeni týraly habarlaǵan.
Astana soty "ekstremıstik uıym" dep tanyǵan qozǵalystyń negizin qalaýshylardyń biri - Qazaqstan prezıdenti Nursultan Nazarbaevty ymyrasyz synap júrgen, qazirgi kezde shetele turyp jatqan opozısıalyq saıasatker ári burynǵy bankır Muhtar Áblázov buǵan deıin áleýmettik jeliler arqyly mamyrdyń 10-y kúni Qazaqstan bıliginen saıası kózqarasy úshin qýǵyndalyp, jazaǵa ushyraǵan tutqyndarǵa bostandyq berýdi jáne azaptaýdy toqtatý talabymen aksıa ótkizý josparlanǵany týraly habarlaǵan.
Belsendilerdiń aıtýynsha, bul narazylyq aksıasy Eýropa parlamenti resmı delegasıasynyń Qazaqstanǵa arnaıy saparmen kelýine oraılastyrylyp ótkizilip otyr. Delegasıa Eýropa Odaǵy men Qazaqstan arasynda jasalǵan seriktestik pen yntymaqtastyq týraly kelisimniń oryndalý barysyn baǵalamaq. Kelisimde qarastyrylǵan baptardyń arasynda Qazaqstanda adam quqyqtary men azamattyq bostandyqtardyń saqtalýyn qamtamasyz etý de bar.
Sáýirdiń 25-i kúni Eýropa keńesi parlamenttik assambleıasynyń (PASE) 29 depýtaty Qazaqstan bıliginen halyqaralyq mindettemelerin oryndaýdy, solardyń arasynda sóz bostandyǵy men beıbit jıyn ótkizý erkindigin qamtamasyz etip, áleýmettik jelilerdi shekteýdi doǵarýdy talap etken.
Quqyqqorǵaýshylar Qazaqstandy otyz jylǵa jýyq ýaqyt úzdiksiz basqaryp otyrǵan prezıdent Nursultan Nazarbaevtyń avtorıtarlyq bıligin saıası qarsylastary men azamattyq belsendilerdi qýǵynǵa salyp, sottap, sóz bostandyǵy, jıyn ótkizý erkindigi tárizdi negizgi quqyqtar men bostandyqtardy shektep otyr dep jıi synaıdy. Qazaqstan bıligi mundaı aıyptaýlardy joqqa shyǵarady jáne elde saıası tutqyn joq dep málimdeıdi.
Mıtıńige kelgenderdiń kópshiligin polısıa ustap, adam qarasy sıregende polısıa Azattyq tilshisine komentarı bergen taǵy birneshe adamdy, onyń ishinde jasy úlken áıel adamdardy da ustady.
Oqıǵa ornynda júrgen polısıa ókilderi azamattardyń ne sebepti ustalǵany týraly komentarı berýden bas tartty.
