Memleket basshysy Alakól aýdanynyń Aqshı kentindegi temir jol vokzalynyń jańa ǵımaratyn aralap kórgen soń, elimizdiń týrızm salasyn jáne kólik-logıstıka ınfraqurylymyn damytý máseleleri jóninde keńes ótkizdi.
Jıyn barysynda óńir basshysy Amandyq Batalov Nursultan Nazarbaevqa Almaty oblysyndaǵy týrızmniń damý barysy jóninde baıandady.
«Sońǵy tórt jylda oblysta týrısik qyzmet kórsetý kólemi eki ese artty. Bul kórsetkish 2014 jyly 3,9 mlrd teńgeni qurasa, 2017 jyly 8,3 mıllıard teńgege ósti. 2018 jyly muny 10 mlrd teńgege deıin jetkizýdi josparlap otyrmyz. Alakól aýdanynda kórsetilgen qyzmet kólemi 2017 jyly 3,5 mlrd teńgege jetip, 2014 jylǵy deńgeımen salystyrǵanda 8 ese artty», — dedi Almaty oblysynyń ákimi.
Investısıalar jáne damý mınıstri Jeńis Qasymbek «Nurly jol» ınfraqurylymdy damytýdyń memlekettik baǵdarlamasynyń jergilikti jáne respýblıkalyq mańyzy bar avtomobıl joldaryn salýǵa qatysty bóliginiń iske asyrylý barysy jóninde baıandady.
«2017 jyly respýblıkalyq mańyzy bar 4 myń shaqyrymnan astam avtomobıl jolyna jóndeý jumystary júrgizildi. Sonyń ishinde 603 shaqyrym jol paıdalanýǵa berildi. Jalpy, 2022 jylǵa deıin 24 myń shaqyrym joldyń bári bir qalypqa keledi degen oıdamyz», — dedi Investısıalar jáne damý mınıstri.
Sondaı-aq, keńeste «Qazaqstan temir joly» UK» AQ prezıdenti Qanat Alpysbaev Memleket basshysyna 2020 jylǵa deıingi Alakól demalys aımaǵyndaǵy kóliktiń qoljetimdilik kartasyn tanystyryp, tranzıttik tasymaldaý isin damytý strategıasynyń júzege asyrylýy barysy jóninde baıandady.
Mádenıet jáne sport mınıstri Arystanbek Muhamedıuly ishki jáne syrtqy týrızmdi damytý jolynda barlyq kedergilerdi joıý maqsatymen Qazaqstan halqyna arnalǵan Joldaýda berilgen tapsyrmalardyń iske asyrylýy, sonymen qatar "Ekspo"-nyń tıimdi ózgeristerin qoldaý úshin mınıstrlik tarapynan atqarylyp jatqan sharalar jóninde baıandady.
«Elimiz týrızmniń ekonomıkalyq nátıjesin "Ekspo"-ny ótkizý barysynda naqty sezindi. Sol kezde Qazaqstanǵa 7 mln-nan astam týrıs keldi. Bul ótken jylmen salystyrǵanda 18%-ǵa artyq. İshki týrızm legi 20%-ǵa ósip, shamamen 6 mln adamǵa jetti», — dedi vedomstvo basshysy.
Nursultan Nazarbaev keńestiń jáne týrısik klaster nysandaryn aralaýdyń qorytyndysy boıynsha ortalyq memlekettik jáne jergilikti aqtarýshy organdarǵa Qazaqstannyń týrızm salasyn odan ári damytý jóninde birqatar tapsyrma berdi.
«Alakól Qazaqstan boıynsha demalýshylar eń kóp baratyn jerge aınalýy kerek. Ol yńǵaıly jerde ornalasqandyǵymen erekshelenip, barlyq óńirdiń turǵyndary úshin qoljetimdi bolyp otyr. Kóldiń keremettigi sýynyń emdik qasıetine baılanysty. Onyń quramynda radon, silti jáne basqa da paıdaly elementter bar. Osyǵan baılanysty Alakól elimizdiń týrızm salasy úshin óte mańyzdy», — dedi Memleket basshysy.
