15 jyldan beri uıymdastyrylyp kele jatqan Eýrazıa Medıa forýmy bıyl da joǵary deńgeıde ótpek. Eýrazıalyq medıaforýmǵa álemniń ár túkpirinen jınalatyn jýrnalıser, saıasattanýshylar, qoǵam qaıratkerleri qandaı máselelerdi talqylaıdy? Jyl saıyn bul sharaǵa qomaqty qarjy bólinip, shetelderden qonaqtar shaqyrylady. Alaıda, soǵan salǵan resýrstar ózin qanshalyqty aqtaýda? Bizdiń jýrnalıserimiz olarmen teń dárejede suhbatqa shyǵa ala ma? Osyndaı suraqtar árkimniń de kókeıinde bar.
Forýmnyń negizgi otyrystarynyń biri «Eýropalyq Odaqtyń evolúsıasy» dep atalady eken. Onda Odaqtyń qazirgi qıyndyqtary men bolashaqtaǵy damý múmkindikteri talqylanady deıdi uıymdastyrýshylar.
Olardyń aıtýynsha, mundaı taqyrypty tańdaý qalypty jaǵdaı. Sebebi, Eýropalyq Odaq biregeı. Ol Eýropanyń damýy men turaqtylyǵynyń belgisi bolyp sanalady. Munymen qatar, sońǵy ýaqytta Eýropalyq Odaq: bosqyndar jáne qaryzdyq daǵdarys, BREXIT sıaqty ekonomıkalyq jáne saıası máselelermen betpe-bet kelýde. Sondyqtan medıa forýmda Odaqtyń bolashaq úlgisi men sıpaty jan-jaqty qaralady-mys.
Otyrys barysynda, Ulybrıtanıa Syrtqy ister mınıstrliginiń baspasóz hatshysy Saımon Makdjı, VVS telearnasynyń jańalyqtar redaktory Gevın Húıtt, halyqaralyq saıasat boıynsha sarapshy, Le Figaro gazetiniń negizin qalaýshy fransýzdyq Reno Jırar, Eýropa Keńesiniń «Sever-Úg» ortalyǵynyń basshysy, Italıa parlamentiniń múshesi Debora Bergamını Polsha «Soıýz demokratıcheskıh levyh sıl» (SLD) partıasy tóraǵasynyń orynbasary, Ejı Venderlıh, Media & Strategic Communications Eýropalyq Odaq máseleleri boıynsha maman Elı Hadjıeva óziniń sarapshylyq kózqarastaryn bildiredi.
XV Eýrazıalyq Medıa forým, «Evolúsıanyń 15 jyly: álem qalaı ózgeredi jáne bizdi qalaı ózgertedi» taqyrybymen uıymdastyrylyp otyr. Sondaı-aq, bıylǵy jyly Forýmnyń keńeıtilgen baǵdarlamasy boıynsha: «Halyqaralyq qarym-qatynastar evolúsıasy: ǵalamdyq salqyndaý», «Qorshaǵan orta evolúsıasy: bultartpas apokalıpsıs nemese jasyl ekonomıkaǵa kóshý», «Qoǵamdaǵy senim evolúsıasy: jańa zamanda qoǵamdy qalaı basqarýǵa bolady?», «Faktiden feık-jańalyqtarǵa deıingi aqparattyq tehnologıalar evolúsıasy. Alańdaý qajet pe?», «Medıa evolúsıasy: blog salasynyń damýy - qater me álde alǵa jyljý ma?», «Adamgershilik pen qundylyqtar evolúsıasy: jańa dúnıetanymdy kimder qalyptastyryp otyr?» – degen aýqymdy taqyryptar talqylanatyn bolady.
Sóz joq, bul - ortalyq-azıalyq teńdessiz alań. Onyń ereksheligi jetekshi saıasatkerler men saıasattanýshylar, jýrnalıser, qoǵam qaıratkerleri men ózge de sarapshylardyń álemdik deńgeıdegi áleýmettik-ekonomıkalyq jáne geosaıası máselelerge túrlishe pikir-kózqarastaryn bildirýinde. Osyndaı formattyń arqasynda konferensıa halyqaralyq túıtkilderdi talqylap, sheshim qabyldaýda tıimdi platforma qalyptastyrýǵa qol jetkizdi.
Dıalogtyń mundaı túrin Qazaqstannyń usynýy kezdeısoq emes. Eýrazıa kindiginde ornalasqan Qazaqstan geografıalyq jáne tarıhı jaǵynan túrli ulttar men mádenıetterdiń dıalog quryp, ózara beıbit áreket etetin alańyna aınalǵany anyq. Dál osy jerde EAMF Uıymdastyrý komıtetiniń tóraıymy Darıǵa Nazarbaevanyń bastamasymen dóńgelek ústel aınalasynda sarapshy qaýymdastyǵynyń álemdik kóshbasshylary bas qosyp, ekonomıkalyq jáne geosaıası máseleler boıynsha talqylaý alańyn usynýǵa múmkindik týdy.
Eýrazıa Medıa forýmy 22-24-shi mamyr aralyǵynda alǵash ret Almaty qalasyndaǵy The Ritz-Carlton qonaqúıinde ótedi.
Oǵan 60 elden jáne álemniń túkpir-túkpirinen kelgen 500 delegat jınalyp, 50-ge jýyq halyqaralyq jáne qazaqstandyq sarapshylar, memlekettik qaıratkerler, saıasatkerler, BAQ ókilderiniń pikirin tyńdamaqshy.
Murat Rahımjanov
