Shyǵys Qazaqstan oblysynyń ákimi
D. K. Ahmetov myrzaǵa,
Óskemen qalasynyń ákimi
Q. M. Tumabaev myrzaǵa
oblystaǵy birqatar qoǵamdyq-saıası
uıymdardan
Usynys hat
Elbasynyń «Rýhanı jańǵyrý» baǵdarlamasyna oraı oblysymyzda ózińizdiń salıqaly basshylyǵyńyzben birqatar ońdy sharalar júzege asyp, qazaqsha aıtsaq óńir jurtshylyǵynyń ólgeni tirilip, óshkeni janbasa da birshama sergip, serpilip qalǵany ras. Bul shaǵyn hatta ol sharalardy tizbelep jatý artyq. Desek te onomastıka, toponımıka máselelerine kelgende Elbasynyń talap-tilekterine jaýap bere almaı, jer shuqyp qalatyn tustarymyz da jeterlik. Árıne, «Rýhanı jańǵyrý: Bolashaqqa baǵdarda» Nursultan Ábishuly Nazarbaev memleketimizdiń negizin qurap otyrsa da qazaq halqynyń osy ýaqytqa deıin joǵarydaǵy máselelerde mandymdy jumystar tyndyrýǵa múmkindigi bolmaǵanyn, endi ony kesheýildetsek kesh bolatynyn da emeýirinmen jetkizýge tyrysqan.
Ózderińizge belgili, Shyǵys Qazaqstan, onyń ishinde ásirese Óskemen, Zyrán, Rıdder, Shemonaıha qalalarynyń kóshe ataýlary sonaý Keńestik kezeńdegi keıip-bolmysyn kóp buza qoıǵan joq. Ásirese, oblys ortalyǵy Óskemen kósheleri áli kúngi keshegi bólshevıktik ataýlarmen siresip tur. Qazan tóńkerisiniń «tórkin jurty» - Reseıdiń ózi olardan baıaǵyda arylyp, tazaryp, jańǵyryp alǵan. Al, oblysymyzdyń qalalary men aýyldary Óskemenge qarap boı túzeıtini – shyndyq.
Ardaqty Danıal Kenjetaıuly!
Sizdiń Óskemen qalasy ákimine qaladaǵy 20-dan astam kóshelerdiń ataýlaryn «Rýhanı jańǵyrýǵa...» saı keletindeı etip ózgertý jaıly nusqaý bergenińizdi estip, qatty qýandyq. Siz basshylyq jasaǵan kezde qaladaǵy 700-den astam kóshelerdiń tym qurysa 30 paıyzy qazaqshalanyp qalsa, erteńgi kúni elimiz men jurtymyzdyń aýzynda osy bir ıgilikti isińiz qalatyny shyndyq. Jýyrda jergilikti baspasóz betterinde: «Óskemendegi Voroshılov kóshesiniń ataýy Jaqıa Shaıjúnisovtyń atymen atalǵaly jatyr» degendeı habarlardy birneshe márte oqyp qaldyq. Áńgime mynada.
Jaqıa Shaıjúnisovtyń kezindegi Semeı oblysy aýmaǵynda, atap aıtar bolsaq, Kókpektidegi bilim berý salasyna sińirgen eńbegi mol ekendigi shyndyq. Eńbek ótemine dep ol aǵamyzdyń omyraýyna Sosıalısik Eńbek Eriniń Qyzyl Juldyzy taǵylǵan. Lenın ordenimen alqalanǵan. Áneý bir jyldary Semeıdegi úlken bir kóshege Shaıjúnisov ataýy berildi. Artta qalǵan urpaqtaryna, halqyna ol kisiniń arýaǵy rıza!
Óskemendegi Voroshılov kóshesi - Abaı dańǵylyn qıyp ótetin úlken kóshe. Egerde ol kóshege shynynda da halqynyń ardaqtysynyń ataýy beriler bolsa, oǵan asa úlken aqyn, iri fılosof, kemeńger aýdarmashy, Abaı aǵasynyń pálsapasyn zańdy túrde jalǵastyrýshy, eren túrkitanýshy, qazaq shejiresiniń negizin qalaǵan, ony urpaqqa qaldyryp ketken Shákárim Qudaıberdiulynyń atyn berý kerek!!! Abaı men Shákárim – ultymyzdyń abyroıy men ar-ojdany! Sol eki alyptyń attaryn ıemdengen qos kóshe danalyq pen taǵylymnyń úlgisindeı bolyp qıylysyp jatsa, Shyǵys Qazaqstannyń barsha jurty rıza bolatyny aqıqat!!!
Sonymen qatar taǵy da bir aıtpaı ketýge múldem bolmaıtyn másele bar, ol – Óskemendegi Ýshanov alańyn jańǵyrtý. Ótken ǵasyrdaǵy qylyshynan qan sorǵalaǵan bólshevık Ýshanovqa qoıylǵan eskertkishti julyp tastap, búgingi jáne keler urpaq sanasyn jańǵyrtýymyz qajet! Ol alańǵa Alash kósemi Álıhan Bókeıhanovtyń esimin berip, sol arystyń eskertkishin qoıý lázim!
Elbasynyń elimizdiń strategıalyq damýynda Basym baǵyt dep ekpin túsirip otyrǵan «Rýhanı jańǵyrý...» baǵdarlamasynyń – Sizder úshin de asa mańyzdy ekenin óte jaqsy túsinemiz. Sondyqtan da el men jurtqa sińirip júrgen eńbekterińizdi qaryzym dep emes, paryzym dep túsinetin Sizderdiń bolashaqtaǵy sharýalaryńyzǵa sáttilikter tileı otyryp, osy bir ulttyq-saıası máselelerdi ońdy shesher degen úmittemiz!
QR Jazýshylar odaǵy SHQO fılıalynyń
dırektory: Á. Qańtarbaev.
«QR salalyq kásipodaǵy» SHQO fılıalynyń
Tóraǵasy: T. Túsipbekov.
«Altaı asý» qoǵamdyq birlestiginiń atqarýshy
dırektory: S. Qusanbaev.
SHQ oblystyq Aqsaqaldar alqasynyń
Tóraǵasy: J. Áshimov.
Óskemen qalalyq Ardagerler keńesi
tóraǵasynyń orynbasary: S. Aqanov.
