– Ýkraınaǵa qonaqqa barǵanymda sondaǵy týystarymnan Valentın Kazmırenko degen kásipkerdiń aǵash kómir shyǵaratynyn estidim. Shyny kerek, bul jańalyq meniń qyzyǵýshylyǵymdy oıatty. «Ol qandaı zat eken?» degen suraq ta kókeıimnen ketpeı qoıdy. Kásipkermen kezdesip, jumysymen tanysqannan keıin bizdiń oblysta osyndaı kásipti nege ashpasqa degen oı kelgen edi. Sol kisiden tájirıbe alyp, aǵash kómir jasaýdyń qyr-syryna qanyqtym. Kásipker den óndiriske qajetti pesh satyp aldym, – dep bastady áńgimesin oraldyq Janar Abdýrahmanova.
Sodan soń ol kásippen ıaǵnı quramynda kóp mólsherde kómirtek bar mıkrokeýekti ónimdi óndirýmen aınalysýǵa bet burady. Batys Qazaqstan oblysynyń Aqjaıyq aýdany Býdarın aýyly mańyndaǵy Volkovo kóliniń qasyndaǵy Krasnyı ıar degen jerde jeke kásibin dóńgeletip otyrǵan Janar Berikqyzy óz kásibin ótken jyly bastapty. Memlekettiń qoldaýyna arqa súıegen kásipker «Bıznestiń jol kartasy – 2020» baǵdarlamasy sheńberinde memlekettik-ınnovasıalyq grant ıegeri atanady. Sonyń nátıjesinde 2 800 000 teńge qaıtarymsyz qarjyǵa qol jetkizgen. Osy qarajatqa Ýkraınadan kásibine qajetti pırolızdi pesh satyp alǵan.
Onyń qolynda UP-EKO nyspyly pırolızdi peshte aǵash kómirin óndirýdegi tehnologıalyq-reglamenttik jumystardy oryndaý jáne uıymdastyrý boıynsha oqyǵanyn dálel deıtin anyqtama da bar.
– Shıkizat retinde qýraǵan, órt shalǵan aǵashtardy paıdalanamyz. Osy kásibimiz arqyly ormandy qýraǵan aǵashtardan tazartamyz. Ónimimizdiń sapasy jaqsy bolǵandyqtan, Oral qalasyndaǵy meıramhana-kafelerden suranys kóp túsedi. Máselen, «Aı-Lýna» kafesi apta saıyn bir tonna aǵash kómirge tapsyrys beredi. Sonymen qatar «Baký», «Devıchá bashná», «Aıkar», «Vostochnaıa skazka», «Ý Manasána», «Sım-Sım», «Nıolıt» meıramhana-kafeleri aǵash kómirdi túrli káýaptar men steıkter daıyndaý úshin satyp alady, – deıdi kásipker.
Janar dóńgeletken kásipte aýyldyń on turǵyny jumys jasaıdy eken. Qazir ol úshinshi peshti qosýdyń qamyn jasap júr. Sondaı-aq oǵan Atyraý, Mańǵystaý oblystarynyń turǵyndary da tapsyrys beredi eken. Ónimder 10 kelilik qapshyqpen satylýda. Kásipkerdiń aıtýynsha, kóterme baǵa men alsa, kelisi 120 teńge, al 5-10 qapshyqtap alsa, kelisi 140 teńge den satylady.
