Batys Qazaqstan oblys ortalyǵyndaǵy qoǵamdyq kóliktiń birazy jańarmaqshy. Máselen, reıske shyǵatyn avtobýstary men tasymaldaıtyn jolaýshylar sany jaǵynan ózgelerden oq boıy ozyq sanalatyn «OralTehServıs» seriktestiginiń marshrýtta júrgen avtobýstarynyń 30 paıyzy sý jańa keıipte kóremiz.
Atalmysh kásiporyn 2001 jyly Oral qalalyq avtobýs parki bazasynda qurylǵan bolatyn. Avtoparkten qalǵan qoǵamdyq kóliktermen qyzmet kórsetýdi bastady. Seriktestik dırektory Aleksandr Baklannyń sózine qaraǵanda, «muraǵa qalǵan» avtobýstardyń sany kóp bolǵanymen, sapasy syn kótermedi, naqtylap aıtqanda, jıi syndy, jaǵarmaıdy kóp ysyraptady, ıaǵnı olardy qalpyna keltirip, marshrýtqa shyǵarý úshin biraz shyǵyndanýǵa týra keldi. Budan istiń ónbesin kórgen soń 2004 jyly ózderi lızıńtik negizde sý jańa 20 PAZ avtobýsyn satyp alyp, №20 marshrýtqa qoıdy. Keler jyly Germanıadan jetkizilgen «MAN», «Mersedes» syndy 30 avtobýs №2 marshrýtta jumystaryn bastady. Kásiporyndaǵy úlken jańartý 2007 jyly júrdi. №2 marshrýtqa 30 «LıAZ» jáne uzartylǵan 20 shaqty «PAZ» avtobýstary keldi. Osylaısha birtindep kásiporyn óz tehnıkasymen qyzmet kórsetýge kóshti. Qazir park teńgerimindegi 82 birlik kóliktiń bári ózderiniki. Búgingi tańda olar tórt qalalyq jáne eki saıajaılyq marshrýttarǵa qyzmet kórsetýde.
– Jergilikti aqparat quraldarynda avtobýs bıletiniń baǵasy óskenimen qyzmet sapasy áli de syn kótermeıtindigi týrasynda maqala-materıaldar arakidik jarıalanyp júr. Qala turǵyndarynyń jolaýshylar tasymalymen aınalysatyn kompanıalardyń qyzmetterine kóńili tolmaıtyndary týraly pikirlerin orynsyz demeımiz. Men óz kásipornym úshin jaýap bersem, biz turǵyndarǵa qolaıly jaǵdaı jasaý úshin barynsha jumystanyp jatyrmyz. Máselen, byltyr jyl basynda ótken oblys ákiminiń esep berý kezdesýinde bir qala turǵyny keıbir qoǵamdyq kólikter qysta salqyn ári avtobýs edeni taıǵaq bolatynyn aıtqan edi. Al bizde mundaı kemshilik eshqashan bolǵan emes. Sebebi, munyń bárin qadaǵalaıtyn arnaıy mamandarymyz bar. Avtobýstar keshke reısten kelgen boıda jýylyp-tazartylyp, jyly ǵımaratqa qoıylady. Eger tehnıkada kinárat bolsa, jóndeýshiler brıgadasy ony qalypqa keltiredi. Osylaısha taza, jyly ári esh aqaýsyz avtobýs turǵyndarǵa qyzmet kórsetýge shyǵady. Odan bólek, turǵyndardyń suranysyna baılanysty keıbir marshrýttardaǵy avtobýstar sanyn arttyrdyq. Máselen, 30D avtobýstaryn aıtýǵa bolady. Bul bizge tıimsiz bolsa da, jergilikti atqarýshy bıliktiń, halyqtyń usynys-tilegin qabyl alyp otyrmyz.
350-ge jýyq adam óziniń nápaqasyn taýyp júrgen «OralTehServıs» JSHS – kóp ultty ujym. Bári de tatý-tátti, yntymaqtasa jumys istep, elimizdiń damýyna óz úlesterin qosýda. Soǵan oraı munda memlekettik, ulttyq, kásibı merekelerdi toılaý jolǵa qoıylǵan.
Kásiporynnyń elimizdiń áleýmettik-ekonomıkalyq damýyna qosyp kele jatqan eńbegi memleket tarapynan da baǵalanbaı qalyp jatqan joq. Avtomobıl jáne jolaýshylar kóligi salasyndaǵy eleýli eńbegi úshin seriktestik dırektory «Qazaqstan Respýblıkasynyń qurmetti avtomobıl júrgizýshisi» ataǵyn alyp, óńirine túrli tósbelgi, medaldar taqty. Kásiporynnyń biraz qyzmetkerleri el Táýelsizdiginiń mereıtoılyq medaldarymen, QR Kólik jáne komýnıkasıa mınıstriniń, jergilikti atqarýshy bılik qurylymdarynyń Qurmet gramotalarymen, Alǵys hattarymen marapattalǵan.
