Astanada eski alańnyń aldynda polısıa qyzmetkerleri «Jer satylmasyn» degen jazýy bar plakat ustaǵan bir adamdy ustap áketken. Polısıa onyń beıbit jıyn ótkizý týraly zań buzǵanyn aıtty.

Astanada búgin qaýipsizdik sharasy kúsheıtilgen. Azattyq tilshileriniń habarlaýynsha, Beıbitshilik kóshesin polısıa qyzmetkerleriniń kólikteri qorshap alǵan, al oǵan jaqyn mańda jedel-járdem kóligi men vıdeo baqylaý ornatylǵan mıkroavtobýs tur.

Mundaı qaýipsizdik sharalary Shymkentte de kúsheıtildi. Azattyqtyń jergilikti tilshileri munda da eki adamnyń ustalǵanyn habarlaıdy. Al jergilikti ákimdikterdiń mańyn polısıa torýyldap júr.

Aıta keteıik, mamyrdyń 10-ynda astanalyq belsendiler Maqsat İlıasuly, İńkár Tıshtybaeva, Raýshan Torbaev jáne Ábdýáli Taǵaı 21 mamyrda jerdiń satylýyna qarsy beıbit mıtıń ótkizý týraly jergilikti bılikke ótinish bergen. Olar 2016 jylǵy «jer sherýlerine» túrtki bolǵan negizgi másele – aýylsharýashylyǵy maqsatyndaǵy jerdi sheteldikterge satpaý jáne uzaq merzimge jalǵa bermeý týraly jurtshylyqtyń bılikke qoıǵan talaptary oryndalmaı, bıyl sáýirde parlament maquldaǵan jer týraly zań jobasynda daýly normalardyń ózgerissiz qalǵanyna narazy ekenderin aıtqan. Al Astana ákimdigi ótken aptada belsendilerge beıbit mıtıń ótkizýge ruqsat bermedi.