Ońtústik Qazaqstan oblysynyń ónerpazdary halyqaralyq baıqaýlarda el abyroıyn asqaqtatty. Oqý jyly bastalǵaly óńirimizdegi saz kolejiniń 109 shákirti túrli deńgeıdegi jarystarda júldeli oryndardan kórinip, qoshemetke bólendi. Bul týraly búgin Óńirlik komýnıkasıalar qyzmetinde ótken brıfıńte Ońtústik Qazaqstan saz kolejiniń dırektory Ý.Majıtov málimdedi. Bul jaıynda Qamshy.kz aqparat agenttigi OQO ákimdiginiń baspasóz qyzmetine silteme jasap habarlaıdy.

Kolej dırektory jyl saıyn shákirtteriniń barlyq deńgeıdegi óner saıystaryna qatysyp, júldeli oryndardan kórinip kele jatqanyn aıta kele bıylǵy jetistiktiń erekshelikterine toqtaldy.

«Oblysymyzdaǵy saz koleji – elimizdiń mádenıetiniń damýyna súbeli úles qosyp júrgen kóptegen óner maıtalmandaryn túletken kıeli shańyraq. Osyndaı mártebeli mádenı oshaqtyń shákirtteri jetistikterimen árdaıym qýantyp turýdy úrdiske aınaldyrǵan desem, artyq aıtqandyq emes. Máselen, 2017 jyly 118 oqýshymyz konkýrs jeńimpazy atansa, bıylǵy oqý jylynda júldegerler sany 109-ǵa jetti. Onyń 64-i 2018 jyldyń jetistikteri. Áli oqý jylynyń aıaqtalmaǵanyn eskersek, bıyl rekordtyq kórsetkishke qol jetkizemiz degen oıdamyz», – dedi Ýlýgbek Halmatuly.

Bıyl Italıanyń Rım qalasynda ótken «Primavera Romana» halyqaralyq baıqaýyna Qazaqstannan qatysqan 7 oqýshynyń ekeýi ońtústikqazaqstandyqtar. Sondaı-aq, Italıanyń Pezaro qalasynda ótken XV «Cittadi Pesaro» halyqaralyq jarysqa elimizdiń namysyn qorǵaǵan 8 ónarpazdyń 2-eýi jáne Grýzıada ótken «Rıtmy vesny - 2018» halyqaralyq baıqaý elimizdiń atynan shyqqan 3 ónerpazdyń barlyǵy ońtústikten. Budan bólek, saz kolejiniń shákirtteri elimizdiń Astana, Almaty, Shymkent qalalarynda ótken túrli deńgeıdegi dodalarda top jarǵan.