Atyraýdaǵy Almagúl móltek aýdanyndaǵy 16 qabatty úıde isten shyqqan lıfttiń shahtasyna eki birdeı jasóspirim qulap, qaıtys bolǵan. Qapyda kóz jumǵandar jaıly kýágerler aıtyp berdi. 

Qaıtys bolǵan eki jasóspirim de 2003 jyly týǵan. Onyń biri sol úıde turatyn týystaryna qonaqqa barǵan eken. 16 qabatty úıdegi júk tasıtyn jedelsatynyń shahtasyna oınap júrgen balalar abaısyzda túsip ketken. Alaıda lıft jabyq turǵan desedi. Al balalar ony óz betterinshe ashyp alǵan. 

Atyraý qalasynyń turǵyny Shynar Dúısenǵalıevanyń aıtýynsha, sol kúni lıft mańyna kórshilerdiń bári jınaldy.

"Bári shoshynyp qalǵan. Orys kelinshek "Pomogıte" dep aıqaılap júrdi. Bul kórinisti ári qaraı kórýge júregim daýalamady. Esikti jaýyp aldym. Qyrsyqqanda, jedel járdemge de áreń habarlastyq. Onyń ózi jedel kele qoımady", - dedi Shynar Dúısenǵalıeva. 

Balalardyń biri jedel járdem jetkenshe jan tapsyrǵan. Ekeýi de bastan qatty soqqy alǵan, omyrtqalary jáne moıyn omyrtqalary synypty. Bul úılerdegi jedelsatylarǵa almatylyq "Kaspıı lıft" mekemesi jaýapty. Ákimdikegiler olardy taýyp, jaýapqa tartatyndaryn aıtty.