Ál-Farabı atyndaǵy QazUÝ Shyǵystaný fakúltetinde Ázerbaıjan Demokratıalyq Respýblıkasynyń 100 jyldyǵy qarsańynda Ázerbaıjan tarıhy men mádenıeti ortalyǵy ashyldy.
Ázerbaıjan Respýblıkasynyń Qazaqstandaǵy Tótenshe jáne ókiletti elshisi Rashad Mammadov tarıh jáne mádenıet ortalyǵynyń ashylýyna atsalysqan tulǵalarǵa alǵys aıtty.
«Bul ortalyq baýyrlas elder arasynda bilim men ǵylym salasyndaǵy qarym-qatynasty nyǵaıtýǵa, eki eldiń joǵarǵy oqý oryndarynyń baılanysyn bekite túsýge sep bolady. Sondaı-aq, bul jerden sizder bizdiń elimiz týraly aýqymdy aqparatty tikeleı taba alasyzdar. Ázerbaıjan eline qatysty zertteý jumystaryńyzdyń qaınar kózi bolmaq», - dedi Rashad Mammadov.
Halyqaralyq TÚRKSOI uıymymen birlesip uıymdastyrylǵan mádenıe shara aıasynda Túrki halyqtarynyń qos tulǵasy, Ázerbaıjannyń uly aqyny Hýseın Djavıdtiń 135 jyldyǵy, Ázerbaıjan halqynyń kóshbasshysy Geıdar Álıevtiń 95 jyldyǵyna qatysty konferensıa ótti.
Halyqaralyq Túrki Akademıasynyń Prezıdenti Darhan Qydyráli Túrki áleminiń maqtan tutatyn azamattaryn ulyqtaý sharasy Astanadan bastaý alǵanyn tilge tıek etti.
«Azattyqtyń jarshysy retinde búkil álemge Ázerbaıjan ádebıetin tanytqan Hýseın Djavıdtiń 135 jyldyq mereıtoıy Astanadan, Almatydan, QazUÝ-den bastalyp jatqany biz úshin úlken qýanysh. Hýseın Djavıd Maǵjan (Jumabaev .red) sıaqty uly aqyn bolǵan. Al týra sol Ázerbaıjan halyq Respýblıkasy qulap jatqan kezde, Ázerbaıjan Sosıalısik Respýblıkasy qurylǵan tusta dúnıege kelgen búkilhalyqtyq lıder Gaıdar Álıev te túrki áleminiń maqtan tutar tulǵalarynyń biri», - dedi Darhan Qydyráli.
