Almaty qalasy SSKA oqý-daıyndyq ortalyǵynyń bazasynda Halyq qaharmany, Táýelsiz Qazaqstannyń qorǵanys mınıstri, armıa generaly Saǵadat Qojahmetuly Nurmaǵambetovti eske alýǵa arnalǵan bokstan jıyrma ekinshi halyqaralyq týrnır aıaqtaldy, dep habarlaıdy QR Qorǵanys mınıstrliginiń baspasóz qyzmeti.
Jarys dástúrli túrde ótkizilip otyrady jáne halyqaralyq deńgeıge ıe bolǵan. Qazaqstan, Qyrǵyzstan, Mońǵolıa, Reseı, Tájikstan jáne Ózbekstannan kelgen 150 boksshy birneshe kúnnen beri ózara eń úzdikterdi anyqtady.
"Mundaı týrnırdi ótkizý - boks álemindegi mańyzdy oqıǵa bolyp tabylady. Armıa generaly Saǵadat Nurmaǵabetov atyndaǵy týrnır - otandyq boksshylar arasynda úlken mártebege ıe iri jarys", - dedi Olımpıada oıyndarynyń qatysýshysy, áskerı qyzmetshiler arasyndaǵy álem chempıony, eńbek sińirgen sport sheberi, Almaty qalalyq boks federasıasynyń vıse-prezıdenti Mıhaıl Iýrchenko.
Týrnır nátıjesi boıynsha, eń úzdik boksshy ataǵyna SSKA shtattyq komandasynyń sportshysy Saparbaı Aıdarov ıe bolsa, Erlan Ǵazızov eń úzdik tóreshi atandy. Al "jeńiske umtylys" nomınasıasyn Qyrǵystannan kelgen sportshy Asylbek Amanqululy jeńip aldy.
Salmaq kategorıalary arasynda týrnır jeńimpazdary mynadaı: Berikbaev Mardan (SSKA, 49 keli), Mýzaparov Anvar (SSKA, 52 keli), Kýchkarov Abdýllo (Ózbekstan, 56 keli), Sıhymbaev Aıdyn (OQO, 60 keli), Erdenebat Sendbaatar (Mońǵolıa, 64 keli), Ómirtaı Nurhat (Qaraǵandy oblysy, 69 kg), Aıdarov Saparbaı (SSKA, 75 keli), Sabırov Nurlan (Mańǵystaý oblysy, 81 keli), Sandrahmanov Madıar (Ózbekstan, 91 keli) jáne Fomınyh Dmıtrıı (Reseı Federasıasy, 91 keliden joǵary).
"Men bárine rızamyn, myqty daıyndyqpen kelip, jeńiske umtyldym. Qarsylastarym - óte kúshti, jekpe-jek ońaı bolmady. Komandamyzdy jeńisimen quttyqtaımyn! Jattyqtyrýshylarymyzǵa, komandaǵa jáne bizdi qoldaǵan jankúıerlerimizge úlken rahmet!", - dep alǵysyn bildirdi 75 keli salmaq kategorıasyndaǵy jarystardyń jeńimpazy, Armıanyń Ortalyq sport klýbynyń sportshysy Aıdarov Saparbaı.
Jeńimpazdar jarys nátıjeleri boıynsha, osy jyldyń mamyr aıynda Astana qalasynda ótetin QR Prezıdentiniń kýbogine arnalǵan týrnırge jáne 18 tamyz ben 2 qyrkúıek aralyǵynda Indonezıada ótetin Azıa chempıonatyna qatysýǵa úmitker retinde qaralatynyn aıta ketý kerek.
