Almatyda dárigerler týberkýlezben aýyratyn naýqastarǵa qajetti tegin dári-dármektiń taýsyla bastaǵanyn aıtyp, dabyl qaǵýda.

Bul máseleni Almatyda ótken qoǵamdyq keńes otyrysynda qalalyq Densaýlyq saqtaý basqarmasynyń basshysy Serikbol Mýsınov kótergen bolatyn.

Onyń aıtýynsha, tegin dári-dármek tapshylyǵy máselesi byltyr kúzden bastalǵan.

«2017 jyly dári-dármekpen ambýlatorıalyq qamtýǵa Respýblıka búdjetinen 16,5 mlrd teńge bólingen bolatyn. Alaıda, bul qarajat jetpedi. Sonyń kesirinen tapshylyq týdy. Bıyl QR DSM 2 aıǵa qajetti 1,1 mlrd teńgeniń ornyna 894 mln teńge ǵana bólgen bolatyn. Osylaısha, jazylǵan reseptterdiń 70 paıyzy ǵana qamtamasyz etildi. Qalǵanyna dári jetpedi», - dedi Serikbol Mýsınov.

Bıyl Almaty qalasy 29 mlrd teńgege ótinim bergen. Alaıda, respýblıkalyq búdjetten 15,9 mlrd teńgeni qysqartyp tastady.

Qala ákimdigi 9,1 mlrd teńge kóleminde qosymsha qarajat bólindi.

Basqarma basshysy týberkýlezben aýyratyn naýqastardy dári-dármekpen qamtý máselesi de ýshyǵyp turǵanyn aıtty. «Týberkýlezben aýyratyndarǵa dári-dármek alynǵan joq. Maýsym aıynda olardyń qory taýsylady. Biraq, ondaı olqylyqty boldyrmas úshin áreket etip jatyrmyz. Jalpy alǵanda 433 ataýdyń 5-i  boıynsha dári-dármek tapshylyǵy baıqalady», - dedi S.Mýsınov. 

Aıta ketý kerek, byltyr Qazaqstanda ınsýlınge táýeldi dıabet naýqastaryn dárimen qamtý prosesi úzilip qalyp, halyqtyń narazylyǵyn týdyrǵan bolatyn.