KADEH-2018 halyqaralyq kórmesinde aqparattyq stend qulaǵan kezde jaraqat alǵan er adam aýrýhanada kóz jumdy. Bul týraly Qazaqstannyń qorǵanys jáne aeroǵarysh ónerkásibi mınıstrliginiń baspasóz qyzmeti habarlady.

Vedomstvoda kórsetilgendeı, zardap shekken azamatqa kórmede kezekshilikte bolǵan jedel járdem brıgadasy der kezinde medısınalyq kómek bergen. 

Keıin zardap shegýshi aýrýhanaǵa jatqyzyldy. Aýrýhanaǵa apara jatqanda esin biletin, jaǵdaıy bir qalypty boldy. Alaıda medısınalyq mekemede háli kúrt nasharlap, dárigerler onyń ómirine arasha túse almady.

Al qulaǵan jarnama konstrýksıasyn "Astana Ekspo KS" JSHS kompanıasy jaldaǵan merdiger ornatypty. Qazir quzyretti memlekettik organdar qaıǵyly oqıǵaǵa baılanysty tergeý júrgizip jatyr.

Qaza tapqan er adamnyń otbasyna qajetti járdem kórsetiledi.

Mınıstrlik marqumnyń otbasy men týǵan-týystaryna kóńil aıtady.