Almatyda «Sporttyq Almaty» baǵdarlamasy aıasynda jyl saıyn ótetin ulttyq sport túrlerinen «Uly dala oıyndary» respýblıkalyq festıvali ótti.
Bıylǵy jyly bul festıvaldiń jalpy júlde qory 18 mln. teńgeni qurady. Jarys Almatynyń ıpodromynda elimizdiń ár oblysynan kelgen sportshylardyń qatysýymen ótkizildi.
Shabandozdar at jarysy, kókpar, aýdaryspaq, teńge ilý, jamby atý, qazaq kúresi, qyz qýý syndy ulttyq sport túrleri men oıyndarynan synǵa tústi.
Festıvaldiń ashylý saltanatynda at sporty federasıasynyń ókilderi men Almaty qalasy ákiminiń orynbasary Arman Qyryqbaev, Almaty qalasy Dene shynyqtyrý jáne sport basqarmasynyń basshysy Ábil Dóńbaev qatysty.
«Almaty qalasynda jyl saıyn 3000-nan astam túrli dárejedegi sporttyq sharalar ótedi. Onyń ishinde shoqtyǵy bıikterdiń biri - búgingi "Uly dala oıyndary". Ol arnaıy Otan korǵaýshy kúni merekesinde uıymdastyrylyp otyr. Erteń, ózderiniz biletindeı, alǵashqy ret qalamyzda beldesýden "Halyq Barysy" ashyq respýblıkalyq týrnıri ótedi. Búgingi kúnniń ózinde oǵan 1000-nan astam palýan tirkeldi», - dedi óz sózinde Arman Qyryqbaev.
Saltanatty shara barysynda festıvál qonaqtary bıshiler, ánshiler jáne kaskaderlardyń ónerine kýá bolyp, artynsha óner buıymdary kórmesin tamashalap, saıatshylardyń qustarymen, ańshylyqqa shyǵatyn tazy ıttermen tanys boldy. Sonymen qatar, kez kelgen qonaq toǵyzqumalaq oınap, asyq atyp, qoshqar kóterý men baǵanaǵa shyǵýdan saıysqa tústi. Jeńimpazdar baǵaly syılyqtarǵa ıe boldy.
Sondaı-aq, shabandozdar jáne palýandardyń jeńimpazdary men júldegerleri medal jáne aqshalaı syılyqtarmen marapattalady. Jarys qorytyndysy boıynsha, aýdaryspaqtan óz salmaqtarynda Azat Jumadilov (60 kg), Dáýlet Erejepbaev (70 kg), Meıirbek İlembaı (80 kg), Túımebek Jumalıev (+90 kg) jeńimpaz atandy. Qyz qýý oıynynda ýaqyt boıynsha jeńgen Marlen Qanat pen Ramına Dıdar juby bolsa, teńge ilýden Ernat Málimbaı úzdik atandy. Jamby atýdan mergendik tanytqan Saıan Qystaýbaev boldy.
Báıgeler jarysynda júırikterdiń qatarynda úzdik bolǵandar: ushqyr báıge (1000 m) jeńimpazy «Mandarın» aty, ıesi Ámirkulov. Alaman báıge (21 km) utyp alǵan «Amanat» - ıesi Ulan Omarov, jorǵa báıgede (7 km) birinshi kelgen «Kókjaılaý» - Tursyn Sabazbekov, al, qunan báıgede (9 km) «Bolashaq» - Dinmuhamet Asqaruly.
Bul jarysta kókpar oıyny da qonaqtardyń qyzyǵýshylyqtaryn oıatty. Tartysty dodada jańadan qurylǵan Almaty qalasy quramasyn qosqanda tórt komanda qatysyp, almatylyqtar jeńimpaz atandy. Olar Astana qalasyn fınaldyq oıynda 3:0 esebimen utty. Úshinshi orynǵa Jambyl oblysynyń kókparshylary jaıǵasty.
Aıta keter jaıt, «Uly dala oıyndary» respýblıkalyq festıvali «Sporttyq Almaty» jobasy aıasynda Ulttyq at sporty federasıasynyń kómegimen úshinshi jyl uıymdastyryldy. Jeńimpazdar men júldegerler medaldar jáne aqshalaı syılyqtarǵa ıe boldy. Eń joǵary syılyq - 5 mln. teńge alaman báıge jeńimpazyna buıyrdy.
