Bokstan Álem jáne Azıa jeńimpazdary men júldegerleri Almaty qalasy ákimdiginiń qoldaýymen iske qosylǵan «Batyl bol» jobasy aıasynda jaǵdaıy tómen otbasydan shyqqan bala­larǵa sheberlik sabaq ótkizdi.

Sporttyq shara Naýryzbaı aýdanynda ornalasqan sport keshen­deriniń birinde boks fede­rasıasy ókilderi, osy jobanyń dırektory Muhtar Tursynov jáne Almaty qalasy Deneshy­nyqtyrý jáne sport basqarma­synyń ókili Nurbek Marsulynyń qatysýymen ótti.

50-den astam balalar jańa jattyǵýlarmen tanysyp, ataqty boksshy qyzdar Nazym Qyzaıbaı, Balnur Bolatbek, Rano Parka­tova, Araılym Maıasar jáne «Astana Arlans» boksshylary Dastan Beken, Sultan Abdraı­mov, Bekjan Asqanbaımen birge óz sheberlikterin baıqady. Bar­lyq qatysýshylar kóterińki kóńilde bolyp, qýanyshtaryn jasyrmady.

– Maǵan bul sheberlik sabaǵy qatty unady. Nazym Qyzaıbaı men úlgi tutatyn sportshylardyń biri. Ózim sol kisi jáne Gennadıı Golovkın men Qanat Islam sekil­di bolǵym keledi. Ózim bokspen aınalysyp júrgenime 6 aı boldy, birneshe jarystarǵa qatysyp, bireýinde qola aldym, – deıdi 10 jasar Marden Esen.

Bul pılottyq jobanyń basty maqsaty – jaǵdaıy tómen jáne kópbalaly otbasydan shyqqan mektep jasyndaǵy balalardy shahmat, boks, qazaq kúresi jáne toǵyzqumalaq sportyn tegin úıretý bolyp tabylady. Joba ázirshe Naýryzbaı aýdanynda iske qosylǵan.

– Qazir bizde  6-dan 17-jasqa deıingi 800 bala bar. Osy tórt sport túriniń ishinde suranysqa shahmat sporty ıe. Onda 350-den astam adam oqıdy. Barlyǵyn óz isteriniń mamandary daıyndaıdy. Biz endi qazirgi kórsetkishti ósirip, jyldyń  sońyna deıin jaqsy nátı­jege qol jetkizemiz dep oılaımyn, – deıdi «Batyl bol» jobasynyń dırektory Muhtar Tursynov.

Óz kezeginde uıymdas­tyrý­shylar barlyq qatysýshylar men sportshylarǵa syılyqtar jáne dıplomdar syılady. Eki dúrkin álem chempıony Nazym Qyzaı­baıdyń  aıtýynsha, osyndaı sheberlik sabaqtar jıi ótip tursa,  balalardyń jeńiske degen jigeri artady deıdi.

– Osy balalar arasynda bola­shaqta biz sıaqty chempıon­dar ósedi dep oılaımyn. Qala ákimdiginiń bul bastamasy óte keremet, men rızamyn, – dep Nazym Qyzaıbaı óz oıyn bildirdi.

Aıta keter jáıt, Almaty qalasy ákimdiginiń qoldaýymen naýryz aıynyń basynda quryl­ǵan «Batyl bol» jobasynyń basty maqsaty – jaǵdaıy tómen jáne kópbalaly otbasydan shyq­qan balalar men jasóspi­rimderdi salaýatty ómir saltyna beıimdep, olardyń  arasynda daryndy sport­shylardy anyqtaý bolyp tabylady.