Shahar kóshelerinde  zańsyz ornatylǵan 1632 dúńgirshek bary anyqtalǵan. Olardyń 1510-i tolyǵymen buzylsa, 17 dúńgirshekti alyp tastaý jumysy 1 shildege deıin aıaqtalmaq. Al saýda ortalyqtary men bazarlardyń aýmaqtarynda ornalasqan qalǵan 105 nysannyń ıelerimen dúńgir­shekterdi jańartý nemese alyp tastaý boıynsha kelissózder júrgizilýde.

Bul týraly Óńirlik komýnıkasıalar qyzmeti alańynda qalalyq Kásipkerlik jáne ındýstrıaldy-ınnovasıalyq damý basqarmasynyń basshysy Maqsat Qıqy­mov­pen ótken brıfıńte belgili boldy.

Dúńgirshekterdi buzbas buryn qaladaǵy aýdandyq ákimdikter dúńgirshek ıelerimen olardyń áreketiniń zańsyzdyǵy týraly túsindirý jumystaryn júrgizgen. Sebebi, atalǵan stasıonarlyq emes saýda nysan­da­rynyń quqyǵyn belgileıtin qujattary bolmaǵan ári qalany kóriktendirý qaǵıda­laryna, órt sóndirý, sanıtarlyq-epıde­mıologıalyq jáne qaýipsizdik talapta­ryna saı kelmegen.

Degenmen, zańdy túrde ornatylǵan dúńgirshekter de joq emes. Alaıda, olardyń jalǵa alý merziminiń ótýine baılanysty súrilgen. Jalpy alǵanda, qala kóshele­rindegi 386 dúń­girshek zańdy túrde jumys istegen. Ótken jyly olardyń 264-i alynyp tastalsa, qal­ǵan 122 nysannyń 44 dúńgir­sheginiń jalǵa alý merzimi jyl sońyna deıin belgi­lengen. Al 71 dúńgir­shektiń merzimi 2019–2025 jyldary aıaqtalsa, 7 dúńgirshek jeke aýmaqtarda ornalasqan.

Stasıonarly emes saýda nysandaryn «kóleńkeden» shyǵarýdyń mańyzy men atal­ǵan basqarmanyń ótken jylǵy jumy­syn qory­tyn­dylaǵan basqarma basshysy kásipker­likten túsken paıda men jańadan ashylǵan ju­mys oryndary jaıly da esep berdi.

Búginde Almatyda 240 myńnan astam shaǵyn jáne orta bıznes sýbektileri tirkelgen. Ótken jyly olardyń sany 5,7%-ǵa kóbeıip, 170 myń adamdy quraǵan.