Shahar basshysy Baýyrjan Baıbek qalanyń jas turǵyndarynyń qýanyshyna qatysý úshin Jetisý aýdanyndaǵy «Qulager» yqshamaýdanyna ornalasqan №148 mektep-gımnazıasyna arnaıy keldi. Aldymen qala ákimi Memleket basshysynyń «100 mektep, 100 aýrýhana» baǵdarlamasy aıasynda boı kótergen qalamyzdaǵy tórt mekteptiń bireýi №148 mekteptiń ishin aralap shyqty.
Zamanaýı talaptarǵa saı tolyǵymen jabdyqtalǵan pándik kabınetter, sport zaly, baı kitap qory bar mektep kitaphanasy, asqana, balalardyń sabaqtan tys ýaqyttarda demalýlary úshin barlyq múmkindikteri bar demalys bólmeleri, qysqy baq, salaýattylyqqa, sergektikke bastaıtyn baseın barlyǵy da shahar basshysynyń kóńilinen shyqty. Búgingideı tehnologıalar damyǵan dáýirde kez-kelgen balanyń jańalyqqa qyzyǵýshylyǵy basymyraq ekeni belgili. Byltyr mektepte robototehnıka úıirmesi ashylǵan edi. Qala ákimi osynda izdenip júrgen jas ónertapqyshtardyń ınnovasıalyq jobalarymen tanysyp, olardyń jumystaryna sáttilik tiledi.
Osydan soń, Astananyń 20 jyldyǵy aıasyndaǵy «El júregi Astana» dep atalatyn sońǵy qońyraý saltanaty bastalyp ta ketti. Ortaǵa Elmıra Qashaýlıeva jetekshilik etetin 11 «a» synyp, Qalbúbi Bekenova jetekshilik etetin 11 «á» synyby jáne Baıan Amanqulova jetekshilik etetin 11 «b» synyp oqýshylary shyqty. Altyn uıamen qoshtasqaly turǵan osynaý 73 túlektiń 16-sy «Altyn belgiden», 3-eýi «Úzdik attestattan» úmitkerler.
Endi bir sát oqýshylar qoldaryn dúrsildeı soqqan sol jaq júrek tustaryna qoıyp Qazaqstan Respýblıkasynyń gımnin shyrqady. Barsha mektep bitirýshi túlekterdi, ustazdar qaýymy men ata-analardy Baýyrjan Baıbek izgi tilegimen quttyqtady.
– Jańa ǵana mektep ishin aralap, tanysyp shyqtym. Zamanaýı talaptarǵa saı jabdyqtalǵan mýltımedıalyq kabınetter, demalys bólmeleri, shahmat, doıby buryshtary, sonymen qatar, qalamyz boıynsha 6 mektepte bar baseındi kórdim. Osyndaı ıgilikterdiń bári elimizdegi bilimge jasalyp jatqan qoldaýdy kórsetse kerek. Elbasymyzdyń tapsyrmasy boıynsha mektepterdiń barlyǵy keń jolaqty ınternetke tartylǵan. Sizderge ǵalamtordyń kómegimen bilim júıesindegi, álemdik bilim keńistigindegi barlyq jańalyqpen tanysýǵa múmkindik jasalǵan. Bul rette Elbasymyzdyń «Sıfrly Qazaqstan» baǵdarlamasy óte mańyzdy ról atqarady. Jalpy, qala boıynsha da bilimge keń qoldaý jasalyp keledi. Almatynyń 6 jyl qatarynan UBT qorytyndysy boıynsha birinshi orynda turýy, árıne, ustazdar sizderdiń eńbekterińiz, – degen qala ákimi bıyl da oqýshylardyń jazǵy demalysy úshin qala búdjetinen qomaqty qarajat bólingenin jetkizdi.
Sátin salsa, qala mektepteriniń janynan ashylǵan jazǵy lagerde 223 myń bala demalatyn bolady. Quttyqtaý sózin 11-synyptarǵa baǵyttaǵan shahar basshysy aldaǵy UBT synaǵynan súrinbeı ótip, kez-kelgen ómir emtıhanyn tapsyrýǵa daıyn bolýǵa shaqyrdy. Úlken ómirge qadam basqaly turǵan túlekterge arnaǵan sózin tamasha támsilmen túıindedi.
– Adamnyń ómirde maqsaty bolmasa, onyń maǵynasyz ómir súrip jatqany, – dedi.
Quttyqtaý sóziniń sońynda Baýyrjan Baıbek mektep ujymyna úlken teledıdardy syıǵa tartty. Mekteptiń mártebesin bıiktetip, atyn aspandatyp júrgen daryndy ul-qyz jeterlik. Sondaı maqtaýly oqýshylardyń saltanatty sherýi de úzdik mekteptiń kórsetkishiniń kórinisi boldy. Halyqaralyq olımpıada, ǵylymı joba, óner, sport baıqaýlarynyń jeńimpazy bolǵan 50 oqýshy ortamen júrip ótti. Tarydaı bolǵan 1-synyptyqtar da bir jyl ishinde ózderiniń kóp oqyp, úırengenderin kórsetti. Júrekteri alyp ushqan túlekter mektep maqtanyshy Aıdana Medeýlovanyń oryndaǵan «Mektep válsi» ániniń yrǵaǵyna terbele bıledi. Mine, mektep bitirýshi túlekter úshin eń bir qımastyq sát kelip jetti. Aýlada sońǵy ret soǵylǵan jez qońyraýdyń úni kernedi.
Sońǵy qońyraý, sońǵy qońyraý,
Syńǵyrlap úniń kóńilde tur-aý, – degen án joldary bıikke qalyqtap, appaq kógershinderdiń qanatyndaǵy túlekterdiń armanyn alysqa alyp ketti.
Osylaısha «Almaty qalasynyń orta bilim beretin úzdik ujymy» baıqaýynyń, «Úzdik pedagogıkalyq ujym», baıqaýlarynyń jeńimpazy bolǵan, ashylǵanyna týra 10 jyl tolyp otyrǵan №148 mektep-gımnazıasy úlken óziniń ómirge kezekti qarlyǵashtaryn ushyrdy.
