Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyn qalyń eldiń arasynda keńinen nasıhattaý jáne táýelsiz elimizdiń tiregi - Astana qalasynyń 20 jyldyǵy aıasynda dástúrge aınalǵan «Otyrar talanttary-2018» Vİİ halyq óner festıvali ótti.
Óner baıqaýy - Otyrardyń shyn máninde ulylar men daryndy ǵulamalardyń, óner dúldúlderiniń otany ekendigin dáleldeı túskendeı.
Festıválge aýdannyń 13 aýyl okrýgterindegi talanttar óner saıysynyń erejesine sáıkes 15 janr boıynsha óz ónerleri men týyndylaryn ortaǵa saldy.
Alǵashqy irikteý kezeńine 500-den astam ónerpaz qatyssa, olardyń arasynan iriktelip shyqqan 200-ge jýyq ónerli jandar aqtyq kezeńde baq synady.
Atalǵan baıqaýdan qanshama otyrarlyqtar jarqyraı shyǵyp, respýblıkaǵa tanymal óner juldyzyna aınalǵany belgili.
Aımaq úshin tól óner merekesin aýdan ákimi Erlan Aıtahanov quttyqtaý sózben ashyp berdi. «Kóne Otyrar órkenıetin qaıta jańǵyrtyp, jas talantardyń baǵyn ashqan baıqaýda otyrarlyq Serik Seıitman, Dosqan Odamanov, Saǵyntaı Quttybaı, Dáýren Polatbaev, Erkeǵalı Mahmýthanov, Dáýren Aqsaqalovtardaı birneshe talantty jastar óner kókjıegine qanat qaǵyp, óner sahnasynda aq batasyn alǵan bolatyn. Atalǵan jas órenderimiz búginde halyqaralyq konkýrstarda jeńimpaz atanyp, elimizdiń abyroıyn asqaqtatýda. Búgingi baıqaýdy jeńip shyqqan júırikterdiń ishinen de ultymyzdyń óneri men mádenıetin alǵa súırep, álemge tanytatyn darabozdar shyǵatyndyǵyna kámil senemin» - dedi, E.Aıtahanov.
QR eńbegi sińgen qaıratkeri, ánshi-kompozıtor Marat Omarov tóraǵalyq etken qazylar alqasynyń quramynda Qazaqstannyń halyq aqyny Áselhan Qalybekova, Sh.Qaldaıaqov atyndaǵy oblystyq fılormonıanyń ánshisi Aınur Nurashova, talantty aktrısa Juldyzaı Dúısenbıeva, respýblıkalyq, halyqaralyq baıqaýlardyń jeńimpazy Marhabat Beısenova, QR eńbegi sińgen qaıratkeri, «Daryn» memlekettik jastar syılyǵynyń jáne «QR Tuńǵysh Prezıdenti-Elbasy qory» syılyǵynyń laýreaty Azamat Jyltyrkózovter men Oblystyq mádenıet jáne halyq shyǵarmashylyǵy ortalyǵy dırektorynyń orynbasary Berik Jorabekovterdiń bolýy baıqaýdyń mańyzdylyǵyn arttyra tústi.
Sonda da bolsa júzden júırik shyqqan naǵyz talanttylar óner báıgesinde belgilengen qatań erejeden qaımyqpastan óz ónerlerin pash etti. Nátıjesinde júldegerler men jeńimpazdar arnaıy daıyndalǵan dıplomdar men qarjylaı syı-sıapattarǵa ıe boldy.
Sondaı-aq, aýdanda uıymdastyrylǵan «Onjyldyqtar toǵysynda» aksıasyna óz úlesterin qosyp, jomarttyq tanytqan bir top otyrarlyqtar aýdan ákiminiń Alǵys hatymen marapattaldy.
Festıvaldiń sońy respýblıkaǵa tanymal óner juldyzdarynyń gala-konsertine ulasyp, kórermenderge keremet kóńil-kúı syılady.
