Ońtústik Qazaqstan oblysynda bıyl 780,2 myń sharshy metr turǵyn úı el ıgiline beriledi. 2018 jyldyń 4 aıdyń qorytyndysy boıynsha 296,3 myń sharshy metr turǵyn úı, ıaǵnı 2844 páter paıdalanýǵa tapsyryldy. Bul ótken jyldyń osy merzimimen salystyrǵanda 143,5 paıyzǵa ulǵaıǵandyǵyn kórsetedi. Bul týraly oblys ákimi Janseıit Túımebaev Saryaǵash aýdanyna jasaǵan sapary kezinde aıtty.
Máselen, Saryaǵash aýdanynda ótken jyly 19,9 myń sharshy metr turǵyn úı tapsyrylǵan. Al aǵymdaǵy jyldyń 1 mamyrdaǵy qorytyndysy boıynsha 7,780 sharshy metr turǵyn úı el ıgiligine berildi.
Oblys ákimi Janseıit Túımebaev Saryaǵash aýdanyndaǵy sapary kezinde Qaplanbek oqý-tájirıbe sharýashylyǵy aýmaǵyndaǵy 5 qabatty 585 páterli «Nurly jer» baǵdarlamasymen salynyp jatqan 13 turǵyn úıdiń qurylysymen tanysty. Merdiger mekeme - «Yntymak Bes-Arys» JSHS. Jobanyń quny - 407 mln teńge. Aǵymdaǵy jyly qurylysy bastalǵan 13 turǵyn úı 2019 jyly tolyq paıdalanýǵa beriletin bolady. Óńir basshysy Janseıit Qanseıituly turǵyn úılerdiń sapasyna kóbirek kóńil bólip, qurylys jumystaryn ýaqytyly aıaqtaý qajettigin tapsyrdy. «Qazirgi tańda jańa Saryaǵash boı kóterip keledi.
Qurylysy bastalǵan 45 páterli 13 turǵyn úı aıaqtalsa, 585 otbasy baspanaly bolady. Mundaı jaǵdaı sońǵy 45 jylda bolmaǵan. Bul degenimiz - Elbasymyzdyń halqyna degen qamqorlyǵy, eldiń mereıi. Sondaı-aq, turǵyn úılerdi salý barysynda aýyz sý, gaz, elektr, jylý, jol jáne abattandyrý jumystary syndy barlyq ınfraqurylym máselelerine sheshimin tabatyn bolady. Ásirese, aýdan basshylyǵyna káriz júıesiniń sheshimin tabýdy tapsyramyn», - dedi J.Túımebaev.
Budan bólek, oblys ákimi jospardan tys Saryaǵash qalalyq Halyqqa qyzmet kórsetý ortalyǵyna bardy. Ondaǵy kórsetilip jatqan qyzmettermen tanysty. Sondaı-aq, sol mańdaǵy zańsyz qurylystardy synǵa aldy. Sapasy syn kótermeıtin nysandardyń qala kórkine keri áserin tıgizip jatqandyǵyn aıtty.
Sonymen qatar, aýdandaǵy sapary barysynda óńir basshysy Qaplanbek keden beketi aımaǵyna toqtady. Ondaǵy tozyǵy jetken nysandar men zańsyz saýda núktelerin retke keltirip, keden mańyn abattandyrýdyń qajettigin aıtty.
«Saryaǵash ózge elmen shekaralas jatqan jer. Teatr – kıim ilgishten bastalady degendeı, Ózbekstan elinen kelgen qonaqtar aýdanǵa qarap eldi tanıdy. Sondyqtan ekonomıkany, týrızmdi damytamyz desek, eń áýeli bet-perdemiz bolyp tabylatyn óńirlerimizdi kórkeıtýimiz kerek», - dedi Janseıit Qanseıituly.
Aıta keteıik, aýdan basshysy Qaırat Ábdýálıevke joǵaryda atalǵan kemshilikterdi rettep, qorytyndysyn baıandaý qajettigi tapsyryldy.
