Ońtústik Qazaqstan oblysynyń ákimi Janseıit Túımebaev Saryaǵash aýdanyna barǵan saparynda 585 páterli 13 turǵyn úıdiń qurylys jumysymen tanysty. Merdiger mekeme basshylyǵymen jolyǵyp, birqatar tapsyrmalar berdi.
«Bir ýaqytta 600-ge jýyq otbasynyń páterli bolýy óńirde sońǵy 45 jylda bolmaǵan. Bul degenimiz - Elbasymyzdyń halqyna degen qamqorlyǵy, eldiń mereıi, qýanyshy. Bastysy, turǵyn úıdiń sapasyna kóńil bólip, ýaqytyly qurylys jumystaryn aıaqtaýdy tapsyramyn», - dedi Janseıit Qanseıituly.
Óńir basshysy ótken jyly aýdandaǵy «Agro Fýd Qazaqstan» JSHS-niń ıntensıvti baýynyń alǵashqy kóshetin óz qolymen otyrǵyzyp, jańa jobany bastap bergen bolatyn. Byltyr ǵana jumysy bastalǵan baq búginde 250 gektar aýmaqty qamtyp otyr. Qazirgi tańda ıntensıvti baýda 22 gektarǵa shıe, 13 gektarǵa órik, 70 gektarǵa shabdaly jáne 92 gektarǵa alma kóshetteri egilgen. Bul óńirdegi iri jobalardyń biri. Aıta keterligi, 70 gektar aýmaqqa shabdaly oblysta alǵash ret egilip otyr. Bul da oblys basshysynyń tapsyrmasy aıasynda júzege asqan jarqyn jobalardyń biri.
«Baýdan aldaǵy ýaqytta 60 tonna alma ónimin alý josparlanyp otyr eken. Oblystaǵy ortasha kórsetkish 15 tonna ekenin eskersek, mundaı ónim Ońtústik óńirinde buryn-sońdy bolmaǵan. Osyndaı ozyq tájirıbelerdi ózge aýdandarda da paıdalanyp, ıntensıvti baýlar sanyn arttyrýymyz qajet», - dedi oblys basshysy.
Budan bólek, Janseıit Qanseıituly Saryaǵash aýdanyndaǵy saparynda óńirdegi birqatar zańsyz qurylystar men retsiz saýda oryndaryn synǵa alyp, aýdan basshysyna tapsyrma berdi. Sondaı-aq, jergilikti halyqpen júzdesip, tilekterin tyńdady.
«Ótken jyly Derbisek, Jibek joly, Jemisti, Qyzyljar, Aqjar syndy birqatar aýyldardyń joly kúrdeli jóndeýden ótti. Sondaı-aq, atalǵan eldi mekenderge qosymsha jaıaý júrginshiler joly salyndy. Aýdandaǵy 8 aýyl tabıǵı gazben qamtamasyz etilip, 2700 úıge kógildir otyn bardy. Sonymen qatar, bıyl 13 aýylǵa gaz tartylyp, 10 aýyl táýlik boıy taza aýyz sýmen qamtylatyn bolady», - dedi oblys ákimi.
Aımaq basshysy jergilikti halyqqa tek memlekettiń qoldaýyna ıek artyp otyra bermeı, óz aýlalaryn taza ustap, týǵan jerdiń kórkeıýine árbir azamat úlesterin qosý qajettigin jetkizdi.
