Ońtústik Qazaqstan oblysynda baqsha ónimderin óndirýmen tanymal Maqtaaralda qaýyn-qarbyz pisti. Erte pisetin baqsha daqylynyń túrin ekken sharýalar búginde 55 tonna qaýyn, 45 tonna qarbyz jınap, alǵashqy ónimin Reseı memleketine jónelte bastady.

Maqtaral aýdanynda baqsha ónimderi byltyrǵyǵa qaraǵanda 10-15 kún erte pisip otyr. Bıyl aýdanda jalpy 19 500 gektarǵa  qaýyn, 8 myń gektardan astam jerge qarbyz  egilgen.  Onyń ishinde erte egilgen baqsha daqyldarynyń kólemi 13200 gektardy quraıdy.

Qarbyzdan alǵash bop ónim alǵan «Ábish-ata» sharýa qojalyǵy 20 tonna ónimin syrtqy naryqqa shyǵaryp otyr. Qarbyzdyń kelisin 140 teńgeden bosatqan. Atalǵan qojalyq 3 gektar jerge egilgen qarbyzdyń gektaryna 30 tonnadan astam ónim alýdy josparlap otyr.

Dıqanshynyń jumysyna sáttilik tileı kelgen aýdan ákimi  Jamantaı Beısenbaev «Ábish-ata» sharýa qojalyǵynan alǵashqy artylyp jatqan ónimniń kýási boldy.

«Maqtaral aýdanynyń negizgi kúnkórisi eginshilik. Sondyqtan maqtaraldyq dıqandar kóktemniń árbir kúnin tıimdi paıdalanýdy oılaıdy. Eki qabatty plenkaǵa erte pisetin qaýyn-qarbyz, baklajan, balgarskıı egedi. Búgin mine, qarbyzdyń alǵashqy ónimi Reseıdiń Iakýtıa avtonomıalyq respýblıkasyna satylymǵa jóneltildi. Bıyl maqtaraldyq sharýalardyń ónimi ótimdi  ári ónimdi bolady degen senim mol», - dedi aýdan ákimi.

Aıta keteıik, byltyr Ońtústik Qazaqstan oblysynyń dıqandary 1 mıllıon 300 myń tonna baqsha ónimderin óndirse, sonyń 631 myń tonnasy maqtaraldyq dıqandarǵa tıesili bolatyn.