Maqtaral aýdanynda yńǵaılastyrylǵan bilim uıalarynyń qatary jyldan jylǵa azaıa túsýi tıis. Ol úshin mektep qurylysyna bólingen respýblıkalyq jáne oblystyq búdjet qarjylaryn tıimdi paıdalaný qajet. Sondaı-aq, sapasyna asa mán berilip, qurylysqa baqylaý kúsheıetin bolady. Bul týraly Asyqata kentindegi kúrdeli jóndeýden ótip jatqan "Jeńis" mektep gımnazıasy men Jylysý aýyldyq okrýgindegi jańadan qurylysy júrip jatqan №114 mekteptiń jaǵdaıymen tanysqan aýdan ákimi J.Beısenbaev málim etti.
Aýdan basshysy aldymen Asyqata kentindegi "Jeńis" mektep gımnazıasyna atbasyn burdy. Bilim kórsetkishi boıynsha aýdanda ekinshi orynnan túspeıtin bilim uıasynyń ǵımarattary eskirgen. 1972 jyly 740 oryndyq tıptik úlgide paıdalanýǵa berilgen mektepte búgingi tańda 1159 oqýshy 2 aýysymda bilim alýda.
2017 jyly mektepke kúrdeli jóndeý jumystaryn júrgizý úshin jobalyq smetalyq qujat memlekettik saraptamadan ótkizilip, qurylys-montaj jumystaryna 345 mıllıon 341 myń teńge qarjy qaralǵan. JSQ boıynsha mektep 7 blokqa bólingen. Árbir blogtar boıynsha shatyr, esik, tereze, eden aýystyrý, elektr jelileri, beton tósenish, ishki jáne syrtqy árleý jumystary, órtke qarsy dabyl qaqqysh júıelerin aýystyrý, syrtqy qabyrǵany aspolmen qaptaý jumystaryn júrgizý josparlanǵan.
"Jeńis" mektep gımnazıasynyń dırektory aýdan ákimine mekteptiń jylytý júıelerin aýystyrý jáne ortalyqtandyrylǵan jylytý qazandyǵyn ornatý jumystary jobalyq smetalyq qujatta qaralmaǵanyn jetkizdi. Óz kezeginde aýdan basshysy Jamantaı Qanaıuly máseleni sheshý úshin aýdandyq sáýlet, qala qurylysy jáne qurylys bóliminiń basshysy Sansyzbaı Seıdalıevke tapsyrma berdi.
"Qurylys sapaly bolý úshin biz qadaǵalaýdy kúsheıtýimiz kerek. Ásirese, sapaly materıaldardyń qoldanylýyn basty nazarda ustaýdy kent ákimi men qurylys bóliminiń basshysyna tapsyramyn" - dedi J.Beısenbaev.
Munan soń óńir basshysy Jylysý aýyldyq okrýgine qarasty Ál-Farabı aýylyndaǵy 200 oryndyq №114 mekteptiń qurylys barysymen tanysty. 2017 jyldyń jeltoqsan aıynda bastalǵan nysan qurylysyna 608 mıllıon teńgeden asa qarjy qaralǵan. Jańa ǵımarat aldaǵy bilim kúninde el ıgiligine beriledi dep kútilýde.
