“Qazaqstan Respýblıkasynyń Qaýipsizdik keńesi týraly” zań jobasyn Parlamenttiń eki palatasy qabyldap, prezıdent Nursultan Nazarbaevqa joldady.
Buǵan deıin zań jobasyn depýtattarǵa tanystyrǵan Qazaqstannyń ádilet mınıstri Marat Beketaev onyń qabyldanýy “Qazaqstan Qaýipsizdik keńesin eldiń ulttyq qaýipsizdik pen qorǵanys qabiletin qamtamasyz etýshi organ retinde tanýǵa” múmkindik beretinin aıtqan.
Zań jobasy boıynsha Qaýipsizdik keńesi tóraǵasyna qaýipsizdik keńesin basqarý, otyrystary men jedel jınalystaryn shaqyrý, Qaýipsizdik keńes týraly jaǵdaıdy bekitý, sonymen birge zańnamada qarastyrylatyn ózge ókiletterdi júzege asyrý quqyǵy berilmek.
Zań jobasynda qaýipsizdik keńesiniń mártebesi qaıta qaralǵan jáne keńes konsýltatıvti-keńesshi organnan konstıtýsıalyq organǵa aınalady. Jobada Qaýipsizdik keńesine eldiń ulttyq qaýipsizdigi men qorǵanys qabilettiligin qamtamasyz etý ǵana emes, "ishki saıası turaqtylyqty saqtap, halyqaralyq arenada eldiń konstıtýsıalyq qurylymy men ulttyq múddelerin qorǵaý" jaýapkershiligin de júkteýdi usynady.
Qujatqa saı, Qaýipsizdik keńesiniń quramyn prezıdent keńes tóraǵasynyń kelisimimen jasaqtaıdy.
Qaýipsizdik keńesiniń otyrysy
Zań jobasynyń 3 babyna sáıkes, prezıdent, májilis jáne senat tóraǵalary, premer-mınıstr, memlekettik hatshy, prezıdent ákimshiligi jetekshisi, qaýipsizdik keńesi hatshysy, bas prokýror, UQK tóraǵasy, syrtqy ister mınıstri, qorǵanys mınıstri jáne ishki ister mınıstri Qaýipsizdik keńesiniń laýazymy boıynsha músheleri bolady.
Qaýipsizdik keńesi 1991 jyly Qazaq SSR prezıdenti bolyp turǵan Nazarbaevtyń jarlyǵymen el taǵdyryna baılanysty mańyzdy máseleler sheshiletin konsýltatıvti-keńesshi organ bolyp qurylǵan. Ol 1993 jyly Qazaqstan respýblıkasynyń Qaýipsizdik keńesi bolyp qaıta qurylǵan. Qazir Qazaqstanda Qaýipsizdik keńesi qyzmetin retteıtin jeke zań joq, bul organ prezıdenttiń 1999 jylǵy 20 naýryzdaǵy jarlyǵymen bekitilgen erejeler negizinde jumys isteıdi.
Ázirshe konsýltatıvti-keńesshi organ statýsyndaǵy Qaýipsizdik keńesine kúsh qurylymdary, ortalyq jáne jergilikti atqarýshy bılik organdarynyń jumysyn úılestirip, zań jobalaryn taldaý men zańdardyń oryndalýyn qadaǵalaý fýnksıasy júktelgen.
Qazaqstan tarıhyndaǵy tuńǵysh "Qaýipsizdik keńesi týraly" zań jobasy bıylǵy jyldyń basynda ashyq jarıalanyp, qańtarda parlament qaraýyna túsken bolatyn. Budan keıin qoǵam álgi qujat týraly umytyńqyrap qalǵandaı boldy. Biraq mamyrdyń 16-sy kúni májilis zań jobasyn birinshi oqylymda maquldady, al sosyn týra bir aptadan keıin – mamyrdyń 23-i kúni jarytymdy túzetý engizbesten qabyldap, senatqa joldady.
Nursultan Nazarbaevqa tuńǵysh prezıdent ári "ult kóshbasshysy - elbasy" retinde Qaýipsizdik keńesine ómir boıy tóraǵa bolý quqyǵyn berý ári bolashaq (ázirshe gıpotetıkalyq) prezıdentti Qaýipsizdik keńesiniń "qatardaǵy" múshesi retinde oǵan baǵynyshty etý - zań jobasynyń eń negizgi tarmaǵy deýge bolatyn sıaqty.
