2017 jyly qyrkúıek aıynda memleket basshysy Astana qalasynyń 20 jyldyǵyn merekeleýdi tapsyrǵan bolatyn. Bas qalanyń mereıtoıy qalaı toılanyp jatyr? Qamshy.kz tilshisi osyǵan kóz júgirtken edi.
Qala kúnine daıyndyqtyń úsh baǵytta júrip jatyr. Birinshisi sharaǵa Mádenıet jáne sport mınıstrligi, ózge de áriptestermen birlesken daıyndyq. Ekinshisi - Qazaqstan óńirlerimen ózara is-qımyl. Úshinshisi - sheteldik seriktesterdiń qatysýymen ótetin sharalar. Birinshi toptama boıynsha 600-den astam sharany qamtıtyn, jyl boıy ótetin iskerlik, mádenı, sporttyq baǵdarlamalar jınaqtalǵan. Ony túrli mınıstrlikter, federasıalar, teatrlar jáne basqalary ótkizedi.
Elordamyzdyń mereıtoıyna ótetin túrli mádenı sharalar men konserttik baǵdarlamalardy aıtpaǵanda Astanada halyq ıgiligine jumys isteıtin kóptegen ǵımarattar men saıabaqtar salynady. Mysaly bıyl 6 mektep paıdalanýǵa beriledi.
Eń áýeli astanaday.kz - Astananyń 20 jyldyǵyna arnalǵan is-sharalar saıty
Astananyń 20 jyldyǵyn atap ótýge baǵyttalǵan merekelik sharalar týraly tolyqqandy málimet beretin resmı saıt iske qosyldy. «Búginnen bastap elordamyzdyń 20 jyldyǵyna arnaıy ótkiziletin is-sharalardyń resmı saıty iske qosyldy. Barshańyzdy www.astanaday.kz resmı paraqshasyna shaqyramyz! Jospar jasap, elordamyzdyń mereıtoıyn birge atap óteıik», - dep jazdy qala ákiminiń baspasóz hatshysy Elvıra Júrgenbaeva Feısbýktegi paraqshasynda.
Jańa saıtta 2018 jyldyń maýsym aıynan qyrkúıegine deıingi merekelik sharalardyń kestesi berilgen. Olardyń arasynda konsertter, teatrlyq qoıylymdar, jármeńkeler men resmı, mádenı-buqaralyq, sporttyq sharalar bar.
Buǵan deıin habarlanǵanyndaı, portalda Astananyń 20 jyldyǵyna arnalǵan sharalardyń ýaqyty, ótetin orny, bıletter baǵasy, BAQ-qa arnalǵan baspasóz paraqtary, joldyń jabylýy men kólik turaqtary týraly barlyq málimetter jarıalanady.
Aıta keterligi, qala qonaqtary men turǵyndary úshin sonymen birge Astananyń 20 jyldyǵyna arnalǵan merekelik sharalar týraly aqparatty qazaq jáne orys tilderinde qalalyq «iKomek» jedel áreket etý jáne monıtorıń ortalyǵynan (ol jerde táýlik boıy «109» nómiri jumys istemek) alýǵa bolady.
Qazaqstannyń barlyq astanasyn basyp ótetin kerýen
«Astanaǵa 20 jyl»: Orynbor — Aqtóbe — Qyzylorda — Almaty-Astana avtokerýeni jolǵa shyǵady. Kerýenniń jalpy basyp ótetin joly 5500 km.
Belgili qoǵam qaıratkerleri, belsendi jastar men mádenıet, sport, medısına salasy ókilderinen quralǵan avtokerýen Aqtóbe oblysynan bastaý alyp, kórshiles RF Orynbor oblysy, sonymen qatar Qyzylorda, Almaty jáne Astana qalalaryna deıin jalǵasatyn bolady.
Avtokerýen jol boıynda kezdesken eldimekender turǵyndaryna merekelik kóńil-kúı syılaıdy.
Belsendi jastardan quralǵan top ókilderi eldimekender turǵyndaryna patrıottyq tárbıe berige baǵyttalǵan túrli mańyzdaǵy sharalardy uıymdastyrady. Astana qalasyn keńinen dáripteý, elordamyzdyń oń ımıjin qalyptastyrý maqsatyndaǵy úlestirme materıaldardy taratatyn bolady.
Óz kezeginde, mádenıet ókilderi án men jyrdan shashý shashyp, óner súıer qaýymǵa «Astana – dostyqtyń mekeni» atty merekelik konserttik baǵdarlamasyn uıymdastyrady. «Aıbyndy Astanaǵa 20 jyl», «Na ıstoke dvýh stolıs» atty sýret kórmelerin usynady. Jergilikti turǵyndardyń qatysýymen «Deni saý halyq, deni saý ult» atty sporttyq saıystar oınatylatyn bolady.
Zıaly qaýym, belsendi jastar ókilderi Táýelsiz Qazaqstannyń jetistikterin, Elordamyz Astana qalasynyń álemdik arenadaǵy orny men elimiz úshin mańyzdylyǵyn jetkize otyryp, eldimekender turǵyndarymen kezdesýler ótkizedi. Qyzyqty trenıńter uıymdastyryp, ashyq pikir almasady.
Densaýlyq saqtaý salasynyń mamandary turǵyndarǵa qabyldaý júrgizip, tegin medısınalyq tekserýden ótkizedi.
Avtokerýen Astana kúni qarsańynda Elordamyzǵa kelip jetedi.
Aımaqtarda Astana kúnderi ótip jatyr
Mamyr aıynda Aqtóbe, Atyraý, Mańǵystaý, Batys Qazaqstan oblystarynda Astananyń mádenı kúnderi ótti. Astananyń teatrlary men ónerpazdary oblystardy aralap, aptaǵa jalǵasqan qoıylymdar men konsertter ótkizip, halyq yqylasyna bólendi. Astana qalasynyń mádenı kúnderi jyl boıy jalǵasady. Sáıkesinshe aımaqtardan kelgen ónerpazdar da jyl boıy Astana turǵyndaryna ónerlerin pash etedi.
Al, Qyzylorda oblysy Astanaǵa 1,5 mlrd teńge bólip, syılyq jasap otyr. «Bul bizdiń jańa elordaǵa degen izgi nıetimiz, bizdiń Prezıdentke degen alǵysymyz. Sondyqtan osyndaı sheshim qabyldadyq», - deıdi óńir ákimi. Osy qarjyǵa zymyrandyq-ǵaryshtyq tehnıkanyń ashyq aspan astyndaǵy mýzeıi salynatyn bolady. «Bul óte ásem nysan bolady. Áýejaıdan qalaǵa qaraı jolmen júrgende oń jaqtaryńyzdan «Nur Álem» sferasy kórinedi, al sol jaqta Turan dańǵyly boıynda bıiktigi 70 metrlik zymyran tasyǵyshtar, ıaǵnı «Soıýz», «Proton», «Zenıt» ornalasady», - dedi Qyrymbek Kósherbaev.
Astananyń kórkine kórik qosylady
Astana ákimi Áset Isekeshev Elorda kúnine oraı 7 jańa saıabaq pen gúlzar ashylyp, 40 myńnan astam aǵash otyrǵyzylatynyn málimdedi. Astana ákimi jaýapty tulǵalarǵa 2018 jyly 1 shildege deıin 7 saıabaq pen gúlzardyń qurylysyn aıaqtaýdy, al jyl sońyna deıin altaýyn, 2019 jyly 5 gúlzar men býlvardyń qurylysyna kirisý kerektigin tapsyrdy. Osy aıtylǵan saıabaqtar men gúlzarlarǵa 120 gektar jer bólindi.
Elordanyń 20 jyldyǵyna 2018 jyly 386 myń aǵash otyrǵyzylady, onyń 208 myńy astananyń jasyl beldeýine, taǵy 178 myńy - gúlzar men saıabaqtardan oryn tabady. Ótken jyly jalpy otyrǵyzylǵan aǵashtardyń sany - 312 myń bolǵan.
Jazda elorda kóshelerine pil, qyran, barys, aqqý jáne kerik sıaqty janýarlardyń músinderi - jańa fıgýralar sán beredi. 2018 jyly «Astana-Jasylqurylys» AQ jumysshylary 5 mln-nan astam kóshet egýdi josparlap otyr. Olardyń ishinde shyraıgúl, tagetıs, kerbezgúl, abelıa, úlpek, salpıglossıs sıaqty birjyldyq gúlderdiń 50 túri bar. Munymen qosa, qala kógaldarynda aıylqıaq, sarana, raýshan sıaqty kópjyldyq gúlderdiń 30-dan astam túri otyrǵyzylady. Sondaı-aq, Astanada ala lenta túrindegi kópjyldyq gúlderden, butalar men raýshandardan órilgen san alýan gúlzarlar – mıksborderler jasalady.
Astana halyqaralyq forýmdardyń alańyna aınaldy
Astana ótken 20 jylda tórtkúl dúnıe kóz tikken kóptegen álemdik jáne halyqaralyq forýmdardyń alańyna aınaldy. Jer-jahanǵa Astanadan aqjoltaı aqparat taratylyp, bas qalamyzdyń mártebesi men mereıi asqaqtady.
Búginde Astana halyqaralyq mańyzy bar túrli forýmdar, kongrester men ózge de is-sharalar ótetin Eýrazıa keńistiginiń ortalyǵyna aınaldy. Elordada Álemdik jáne dástúrli dinder lıderleriniń sıezeri, Astana ekonomıkalyq forýmy jáne ózge de mańyzdy halyqaralyq oqıǵalar turaqty túrde ótip keledi. Astanada EQYU-nyń tarıhı samıti, SHYU men IYU-nyń mereıtoılyq samıtteri bolyp ótti. 2011 jyldyń basynda respýblıkanyń elordasy VII Qysqy Azıa oıyndarynyń qatysýshylary men qonaqtaryn qabyldady. Ótken jyly Astanada «Expo-2017» halyqaralyq kórmesi ótti.
Mamyr aıynda ǵana Astanada «Astana ekonomıkalyq forýmy» men V halyqaralyq «KADEX-2018» qarý-jaraq pen áskerı texnıka kórmesi ótti.
Mádenıet jáne sport mınıstrligi Astanada etnıkalyq aýyl ashty
1 mıllıonnan astam týrıs keledi dep kútilgen Astana mereıtoıynda qonaqtarǵa qazaq mádenıetin, salt-dástúrin tanytý maqsatynda Astanada 30 kıiz úıden turatyn etno aýyl ashyldy. Aıta ketsek etnoaýyl ótken jyly EXPO-2017 kórmesiniń qonaqtaryna da qyzmet ketken bolatyn.
Jaz sońyna deıin ashyq bolatyn qazaq aýylynda aýqymdy oqıǵa qazaq mádenıeti men tarıhynyń kóp ǵasyrlyq jaýharyn jınaqtaǵan. Etnoaýyldy óz salasyndaǵy aıryqsha jáne alǵashqy ulttyq joba dep maqtanyshpen aıtýǵa bolady. Keshenniń qaqpasyna kire bergennen qonaqtardy batyr kóshpendilerdiń, sheksiz sar dalany baǵyndyrýshylardyń ejelgi zamanyna qas qaǵym sátte alyp barady. Astananyń mereıtoıyn atap ótýge kelgen ár adam ózi úshin qyzyqty jáne este qalarlyq oqıǵany kórýine múmkindik alady.
Etnaýyl aıasynda etnıkalyq mýzyka jáne teatr óneriniń festıválderi, kórmeler, qoldanbaly-sándik óneriniń ártúrli sheberlik synyptary, ulttyq sport túrleri boıynsha saıystar, atty-sporttyq is-sharalar ótedi. 2,5 myń sharshy metr alańyna jaıylǵan aımaq «Sheberler aýyly», «Sporttyq-sırktik is-sharalar», «Konserttik zal», «Demalys aleıasy», «Dástúrli qazaq jáne shyǵys taǵamdary meıramhanasy», «Ulttyq dástúrler men salttar», «Jibek joly» Shyǵys bazary jáne «Ańshylyqtyń dástúrli túrleri» sekildi kóptegen sektorlarǵa bólingen.
