Astana ákimi memlekettik organdarǵa qala turǵyndarynan úı qurylysynyń sapasyna qatysty shaǵymyn muqıat zertteýdi júktedi. Jekemenshik kásiporyndardyń tarapynan qandaı da bir buzýshylyq anyqtalǵan jaǵdaıda tıisti quqyqtyq sharalardy qoldanýdy tapsyrdy, dep habarlaıdy Qamshy.kz aqparat agenttigi Elorda Info málimetine súıenip.
— Qazir úkimetpen bıznestegi kedergilerdi joıý úshin «Doing Business» saıasaty júrgizilip otyr. Barlyǵy kásipkerlikti damytý úshin jasalyp jatyr. Al sapasyz qurylys úshin turǵyndardyń narazylyǵyna memleket jaýap berip otyr. Qarańyzdar, turǵyn úıdi kim qabyldap alady? Tapsyrys berýshi, bas merdiger – jeke kompanıa, tehnıkalyq qadaǵalaý – jekemenshik kompanıa, avtorlyq qadaǵalaý – jeke kompanıa. Iaǵnı, tórt jeke kompanıa turǵyn úıdi qabyldap alady. Memleket belgili bir búrokratıany joıý úshin bul saladan ákimdikti alyp tastady. MSQB tek konstrýksıany tekseredi, onyń ózinde tek josparly tekseris negizinde. Barlyq jaýapkershilik bızneske júkteledi. Jaýapsyz bıznesmender naryqtan ketýi kerek, biz oǵan kómektesemiz, - dedi Áset Isekeshev.
Buǵan qosa, ol ákimdik qazirgi kúni qurylystyń sapasyn baqylaýǵa qatysty zańǵa ózgeristermen tolyqtyrýlar engizý týraly usynys daıyndap jatqanyn habarlady. Onyń aıtýynsha, sapasyz turǵyn úıdi qabyldaıtyn tulǵalarǵa qatań shara qoldanyp, tipti lısenzıadan aıyrý kerektigin aıtty.
— Tehnıkalyq qadaǵalaý qaıda qarady? Ondaılardy lısenzıasy men attestarynan aıyryp, sotqa berý kerek. Bizde teksere alatyn prokýratýra jáne basqa da memlekettik organdar bar. Qalalyqtardyń barlyq shaǵymdaryn tekserý kerek. Úıdi olaı salýǵa bolmaıdy. Ol - adamdardyń qaýipsizdik máselesi. Men kóptegen kásipkerlerdiń adal ekenin jáne óz abyroıyn oılaıtynyn bilemin. Al myna jaýapsyzdar barlyq kartınany buzyp tur. Bul - bizdiń «Atameken» UKP ortalyq ustanymymyz, - dedi Astana ákimi.
