Astana qalasynyń 20 jyldyǵyna oraı ótip jatqan oblys ákiminiń júldesine arnalǵan XXI halyqtyq sport oıyndarynyń atshabardaǵy ulttyq at sport oıyndary máresine jetti.
Jylyna bir keletin dúbirli dodaǵa ár aýdan óziniń eń úmitti qylquıryqtary men apaıtós-tastaqym azamattaryn ákelipti.
Qazaqtyń qanyn qyzdyratyn kókpar oıyny boıynsha aptaǵa jýyq aıqas júrdi. Tymaqtaryn jymyra kıgen qyzý qandy azamattar óz aýdanynyń namysyn bermeý jolynda baryn saldy. Talaı jyldan beri taqymynan serke bermegen birneshe aýdan bıyl jańa esimderge jol berdi. Sonymen birinshi oryndy Óskemen qalasy men Kópektiniń kókjal namys jigitteri áketti. Tóreshiler olardy aqtyq aıqasqa shyǵarmastan osylaı sheshim shyǵarýdy jón kóripti. Al úshinshi oryn tarbaǵataılyq azamattardyń taqymynda.
Qyz qýar boıynsha kóp sóıleýdiń qajeti az, óıtkeni oblys turmaq respýblıkadan qarsylas shydatpaı júrgen óskemendik Erkenaz ben Rınattyń jubyna bul básekede de eshkim shaq kelmedi.
Úsh shaqyrymnan sál ǵana asatyn ushqyr báıgede Dáýlet Shaıyrǵazınovtyń taqymyndaǵy «Ushqyr» esimdi kókpektilik jel taban jeke-dara keldi. Júldeli, qalǵan eki oryn Shemonaıhanyń qos júıirikteriniń enshisine jazyldy. Qazaq deıtin halyqtyń syr-sıpaty men sal -seriligin áspetteıtin jorǵa jarysynda Rýfat Sapashov mingen zyrándyq janýar úsh aınalym boıy aldyna qara salmaı, qalǵandarynan oq boıy ozyp keldi. Naǵyz sý tógilmes aqpa jorǵa desti jurt. Odan keıin Abaı men Óskemenniń jorǵalary máre syzyǵyn kesti. Jarystyń qyzyǵyn, eldiń yqylasyn arttyratyn taǵy bir jarys — on bes shaqyrymdyq top báıge. Bul synda úrjarlyq Merhat Saparǵalıev aýyzdyqtaǵan júırik kóreremen kóz aıymyna aınalyp, máreden birinshi ótti. ekinshi, úshinshi oryndar Semeı men Aıagózdiń enshisinde ketti. Al eldiń kópten kútken alaman báıgesi, qyzyqty jaǵdaıda ótti. Dál tús áletinde ótkendikten be, álde jyldamdyq sonshalyqty qatty boldy ma, 25 shaqyrymǵa arnalǵan on aınalymdy tek jalǵyz at baǵyndyrdy. basqa attardyń kóbi jol ortadan jarysty aıaqtap jatty. Sonymen azdap daýǵa ulasqan báıgeniń ekinshi, úshini oryndaryna arnalǵan júldelerdi Jarma men Tarbaǵataıdyń atbegileri bólisti. Al, alaman báıgege tigilgen avtokólikti aıagózdik Eljan Erboluly taqymdaǵan «Kógershin» atty sáıgúlik talassyz áketti. Altynshy aınalymnan bastap aldyǵa shyqqan janýar ekinshi kelgen atty bir aınalym artqa tastap keldi. Jeńimpazǵa avtokóliktiń kiltin oblys ákiminiń birinshi orynbasary Erlan Aımuqashev tapsyrdy.
