Óskemende oblys ákiminiń júldesi carapqa salynǵan HHİ halyqtyq sport oıyndary máresine jetti. Tórt kúnge sozylyp, Astana qalasynyń 20 jyldyq mereıtoıyna arnalǵan dodaǵa oblysymyzdyń barlyq aýdan-qalasynan 2 700-den astam sportshy qatysty.
Bıylǵy jarystyń baǵdarlamasyna 22 sport túri engen-di. Bul 21 jyldyq tarıhy bar spartakıadada buryn-sońdy tirkelmegen rekordtyq kórsetkish. Bir aıta keterligi, jarysty uıymdastyrýshylary halyqtyq oıyndardyń mártebesin arttyrý maqsatynda bıyl jastar arasynda tanymaldylyqqa ıe vorkaýt dep atalatyn sport túrin de engizipti. Jalpy, osy jylǵy oıyndardyń aıasynda ótken básekelerdiń qaı-qaısysyn alsań da, tartysqa toly boldy. Muny búgin Óskemendegi ıpodromda ótken spartakıadanyń jabylý saltanatynda oblystyq dene shynyqtyrý jáne sport basqarmasynyń basshysy Asqar Mojanov aıtty.
– Bıylǵy jarysta eshkim kútpegen nátıjeler de tirkeldi. Sol sebepten, oıyndar óte tartysty, ári qyzyqty ótti dep esepteımiz. Máselen, aýdandar arasyndaǵy jalpykomandalyq esepte úshinshi orynnan Abaı eliniń sportshylary kórindi. Buǵan deıingi dodalarda kóshtiń orta tusynda ne sońynda júretin abaılyqtar bıyl barlyǵymyzdy da tańdandyra bildi. Bul basy ǵana, aldaǵy spartakıadalar budan da qyzyq ótedi dep oılaımyz, – degen basqarma basshysy kelesi sporttyq oıyndardy Semeı qalasy ótkizetinin jetkizdi. Qazir atalmysh shaharda oblys ákiminiń tapsyrmasy boıynsha salynyp jatqan birqatar zamanaýı sporttyq nysan eki jyldan keıin spartakıada saıystaryn qabyldaýǵa saqadaı saı bolmaq.
Asqar Mojanov, sonymen qatar kelesi jylǵy «Sáýletaı» oblystyq balalar spartakıadasy da uıymdastyrylýy jaǵynan buǵan deıingi jarystarǵa qaraǵanda anaǵurlym joǵary deńgeıge ótetinin aıtty.
Al endi bıylǵy jarystyń qorytyndylaryna keletin bolsaq, qalalar arasyndaǵy jalpykomandalyq esepte birinshi orynǵa Óskemen qalasynyń quramasy (375 upaı) ıe bolsa, semeılik sańlaqtar ekinshi oryndy máse tutýǵa májbúr boldy. Semeılikter jarys jeńimpazdarynan 36 upaıǵa qalyp qoıdy. Shaharlar arasyndaǵy básekeniń úzdik úshtigin Rıdder qalasynyń komandasy túıindedi. Kenshiler qalasynyń qorjynynda 159 upaı.
Al aýdandar arasyndaǵy jarysta Tarbaǵataı sportshylaryna teń keler eshkim bolmady. Sporttyq oıyndar qorytyndysy boıynsha 320 upaı jınaǵan tarbaǵataılyqtar ekinshi oryn alǵan Ulan aýdanynyń quramasynan (257 upaı) edáýir uzap ketti. Al úshinshi orynǵa, joǵaryda aıtylǵandaı Abaı eliniń sańlaqtary ıe boldy. Olardyń enshisinde 248,5 upaı.
Esterińizge salaıyq, eki jylda bir ret ótetin halyqtyq sport oıyndary tórt kezeńnen turady. Onyń birinshisinde sportshylar aýyldyq okrýgter arasynda úzdikti anyqtasa, odan keıin aýdandyq, oblystyq jáne respýblıkalyq saıystarda kúsh synaıdy. Bıylyǵy dodanyń jeńimpazdary da aldaǵy ýaqytta Batys Qazaqstan oblysynda ótetin el Prezıdentiniń júldeleri sarapqa salynatyn halyqtyq sport oıyndarynyń respýblıkalyq kezeńine joldama alyp otyr.
