Abaı aýdanynyń 90 jyldyǵyna oraı Qaraýylda uly aqynǵa arnalǵan eskertkish boı kótermek. Oǵan aýdannan shyqqan bedeldi azamattar men kásipkerler qarjylaı qoldaý kórsetemiz dep otyr.

Búginde eskertkishke qarajat jınaý maqsatynda «Paryz» qoǵamdyq qory ashylǵan. Aýdandyq máslıhat hatshysy Erlan Ldıbaevtyń aıtýynsha, qoladan jasalatyn atalmysh nysannyń smetalyq quny 15 mıllıon teńgeni quraǵan.

-Ultymyzdyń rýhanı aǵartýshysy, halqyna máńgi óshpes mura qaldyryp, qazaq ádebıetin álemdik deńgeıde moıyndatqan oıshyl Abaıǵa taǵzym etý – basty paryzymyz. Sol sebepten biz uly aqynnyń shyǵarmashylyǵyn nasıhattaý maqsatynda áli talaı sharýa atqaratyn bolamyz, — deıdi Erlan Ldıbaev.

Aıta keteıik, «Jumyla kótergen júk jeńil» dep sanaıtyn abaılyqtar eskertkishti salýǵa bir kúndik jalaqylaryn aýdaryp bermek. Budan bólek bıyl Qaraýyldaǵy ortalyq alań abattandyrylyp, aýdanda buryn sońdy bolmaǵan áýendi sýburqaq salynady dep josparlanýda.