Ońtústik Qazaqstan oblystyq máslıhatynyń kezekten tys jıyrma úshinshi sesıasynda depýtattardyń qaraýyna Shymkent qalasy halqynyń bir mıllıonǵa jetýine oraı, oǵan erekshe mártebe berý, oblys ortalyǵyn Túrkistan qalasyna kóshirý jáne osyǵan baılanysty oblystyń, Túrkistan, Kentaý qalalarynyń shekaralaryna ózgerister engizý máseleleri usynyldy.
Engizilip otyrǵan ózgeristerge sáıkes, Túrkistan qalasynyń oblys ortalyǵy bolýy kezinde qala ákimdigine qarasty 12 aýyl okrýgi Kentaý qalasy ákimdiginiń qaramaǵyna ótetin bolady. Shymkent qalasynyń aýmaǵy ózgerissiz qalyp, oblystyń aýmaǵynan jeke bólinip shyǵýyna baılanysty oblystyń aýmaǵy qysqarmaq. Sonymen qatar, áleýmettik, ákimshilik nysandardyń ornalasý jaǵdaıy men ınfraqurylymmen, onyń ishinde, aýyz sýmen, gazben, avtomobıl joldarymen, baılanys jelilerimen qamtylýy, aǵyn sýmen qamtamasyz etilýi, jer jaǵdaıy, olardyń halyqqa yńǵaıly bolý máseleleriniń barlyǵy eskerilgen.
Sesıa jumysyna qatysqan oblys ákimi Janseıit Túımebaev barshany Shymkent qalasy turǵyndarynyń 1 mıllıonǵa jetýimen shyn júrekten quttyqtady.
«Elbasymyz Nursultan Ábishuly Nazarbaev qashan da ult rýhanıatynyń altyn uıasy, qazaq tarıhynyń túp tamyry – Ońtústikke aıryqsha kóńil bólip keledi. Táýelsiz Qazaq elinde tuńǵysh ret mıllıondyq qalany mejeleý, oǵan arnaıy mártebe berý isi 2014 jyldan bastaldy. Búginde kózdelgen maqsat oryndalyp, Shymkent qalasy turǵyndary 1 mıllıonǵa jetip otyr. Biz Sizdermen birge Shymqalaǵa respýblıkalyq mártebe berýmen qatar, jańadan oblys ortalyǵyn tańdaý baqyty buıyrǵan tarıhı sáttiń tabaldyryǵynda turmyz. Mundaı ortalyq retinde Qazaq eli úshin ǵana emes, ısi túrki álemine ortaq, qasıetti Túrkistannyń tańdalýyn halyqtyń zor yqylaspen qabyldaýyn qýanyshpen atap aıtqym keledi. Muny Túrkistan, Kentaý qalalarynyń shekaralaryna ózgerister engizý barysynda turǵyndarmen júrgizilgen qoǵamdyq tyńdaýlar men ózderińizben talqylaý barysynda aıqyn sezinip otyrmyz»,-dedi aımaq basshysy.
Atalǵan másele boıynsha Úkimet janynan qurylǵan arnaıy jumysshy toppen birlese bólýdiń ekonomıkalyq tıimdiligine, onyń oblystyń, Shymkent, Túrkistan, Kentaý qalalarynyń áleýmettik-ekonomıkalyq damýyna áseri jan-jaqty taldandy.
Joǵaryda atalǵan usynysty qoldaǵan halyq qalaýlylary Ońtústik Qazaqstan oblysynyń ákimshilik-aýmaqtyq qurylysynyń keıbir máseleleri týraly oblys ákimdigi qaýlysy men máslıhattyń sheshimine qol qoıdy.
Jalpy, qalanyń ınjenerlik-ınfraqurylymmen qamtylý deńgeıi joǵary bolyp tabylady. Bul kórsetkishter Shymkent qalasyna erekshe mártebe berýine tolyq múmkindik beredi.
Qazaqta «qos toıyń qabat bolsyn, eki dúnıeń abat bolsyn» deıtin keremet sóz bar ekenin aıtqan oblys ákimi Janseıit Túımebaev Uly Turan dalasynyń temirqazyǵy, Uly túrki babalardyń túpqazyǵy sanalatyn qasıetti ólke Túrkistandy oblys ortalyǵy etý usynysy barshaǵa erekshe oı salatynyn jetkizdi.
«Túrkistan - Rýhty qaırap, Alashty arqalandyryp, taǵdyrly kezeńderde Qazaq deıtin eldi saqtap, berekesin arttyra bilgen qasıetti jer. Sanaǵa silkinis týǵyzyp, otanshyldyq sezimdi tereńdetetin tyń bastama Rýhanı jańǵyrýdyń jarqyn kórinisi bolary anyq. Osy oraıda Túrkistan týrızm salasy boıynsha Samarqand, Buhara, Hıýa sıaqty qalalarmen básekelesip, Túrik áleminiń astanasy jáne oblys ortalyǵy retinde álemdik arenada Qazaqstannyń bedelin bıiktetip mártebesin asqaqtatady dep esepteımin»,-dedi qorytyndy sózinde oblys ákimi.
