AQSH-ta sottalǵan qazaqstandyq Dıas Qadyrbaev 2018 jyldyń 23 shildesinde merziminen buryn bosatylady, dep habarlaıdy QR SİM Informburo.kz resmı saýalyna jaýap retinde.

"Dıac Qadyrbaev Tehastaǵy Big Spring federaldyq túrmesinde jazasyn ótep jatyr. Otandasymyz jaqyn arada bostandyqqa shyǵatynyn qýana habarlaımyz. Túrmeden shyqqan soń Dıasty vıza máselesi boıynsha AQSH-tyń mıgrasıalyq qyzmetine tapsyrady. Úlgili tártibiniń arqasynda Dıas merziminen buryn, 23 shildede bosatylady dep josparlanǵan. QR SİM otandasymyzdyń elge oralýy úshin bar kúsh jigerin jumsap jatyr", - habarlady QR SİM

SİM Dıastyń fızıkalyq, psıhologıalyq jaǵdaıy óte jaqsy ekenin atap ótti.  

"Qazaqstan elshiliginiń ókilderi otandasymyzdyń ákesi Murat Qadyrbaevpen turaqty túrde baılanysyp otyr. QR SİM Dıastyń otanyna oralý prosesin tezdetý úshin bar kúsh-jigerin jumsap jatyr", - delingen habarlamada.

"2017 jyly Qazaqstannyń Bas prokýratýrasy AQSH-tyń ádilet mınıstrligine Dıas Qadyrbaevty otanyna aýystyrý máselesi boıynsha birneshe ret ótinim bergen. Alaıda qylmysynyń aýyrlyǵyna baılanysty otandasymyzdy keri qaıtarýǵa kelisim bermegen", - dep habarlady mınıstrlik.

Bostondaǵy marafon kezinde jarylys uıymdastyrdy degen kúdikpen ustalǵan Azamat Tajaıaqov pen Dıas Qadirbaevqa aıǵaqtardy joıýǵa árekettenip, tergeý amaldaryna bóget jasady degen aıyp taǵylǵan. Tergeý derekterine qaraǵanda, terakttan úsh kún ótkennen keıin olar Sarnaevtyń noýtbýgi men peratehnıkalary bar sómkeni laqtyryp jibergen. Boljam boıynsha, olar jańalyqtardan Sarnaevtyń sýretin kórip, onyń teraktqa qatysy bar ekenin túsingen soń qoldaryndaǵy aıǵaqtardan qutylýǵa kirisken. Keıin ol sómke qoqys jáshiginen tabyldy. Nátıjesinde Dıas Qadyrbaev alty jylǵa, Azamat Tajaıaqov 3,5 jylǵa bas bostandyǵynan aıyryldy. 

2016 jyly Azamat Tajaıaqov Qazaqstanǵa oraldy. Qazir Atyraýdaǵy JOO-lardyń birinde munaıshy mamandyǵy boıynsha bilim alyp júr.