QR densaýlyq saqtaý mınıstri Eljan Birtanov menıngokok ınfeksıasyna qarsy vaksına baǵasyn arzandatý boıynsha jumystar júrgiziletinin málimdedi, - dep habarlaıdyQamshy.kz aqparat agenttigi.

Osyǵan deıin premer-mınıstr Saǵyntaev vaksına baǵasynyń qymbat ekendigin aıtyp, mınıstrliktiń jumysyn synaǵan bolatyn.

Keı óńirlerde ekpe 20 myń teńgeden satylsa, keıbirinde 40 myń teńgege satylyp jatyr. Óz kezeginde premer-mınıstr bul máseleni sheshýdi tapsyrdy.

"Bul másele bar. Farmasıa komıteti dári-dármek baǵasyn turaqtandyrý úshin, óńirlermen jumys jasaı bastady. Meniń oıymsha, ekpeniń baǵasyna arzandatýǵa múmkindik bar. Premer-mınıstr bizge jáne jergilikti atqarýshy organdarǵa baǵasyn arzandatý týraly tapsyrma berdi. Jumys jasaıtyn bolamyz", – deıdi Birtanov.

Esterińizge sala keteıik, Qazaqstanda jyl bastalǵaly 13 adam kóz jumdy. Olardyń altaýy 14 jasqa tolmaǵan balalar. Al ınfeksıadan kóz jumǵandardyń kóbi Almatyda.